అవకాశవాదమే అవాక్కయ్యేలా మహా రాజకీయం

అవకాశవాదమే అవాక్కయ్యేలా మహా రాజకీయం

మహారాష్ట్రలో అధికారం కోసం పార్టీలు చేస్తున్న రాజకీయం పచ్చి అవకాశవాదమన్న మాట అంతటా వినిపిస్తోంది. రేపు సాయంత్రం లోగా ఫడణవీస్ బలం నిరూపించుకోవాలని సుప్రీంకోర్టు ఆదేశించడం.. అన్ని ప్రయత్నాలూ చేసి ఇక బల నిరూపణ అసాధ్యమని భావించి ఆయన రాజీనామా చేయడం తెలిసిందే. అయితే, కొద్దిరోజులుగా రోజుకోరకంగా సాగుతున్న మహారాష్ట్ర రాజకీయాల నేపథ్యంలో ప్రముఖ పాత్రికేయుడు రాజదీప్ సర్దేశాయ్ చేసిన ఓ ట్వీట్ పాత్రికేయ వర్గాలతో పాటు, రాజకీయ వర్గాల్లోనూ చర్చనీయమవుతోంది.

''బీజేపీ ఇకపై ఎన్నడూ అవినీతి గురించి ఉపన్యాసాలు ఇవ్వలేదు. కాంగ్రెస్ లౌకికత్వం గురించి ఉపన్యాసాలు ఇవ్వలేదు. శివసేన హిందూత్వ ఉపదేశాలు ఇవ్వలేదు. ఇక ఎన్సీపీ గురించి ఏం చెప్తాం? రాజకీయాల్లో ఒకే సిద్ధాంతం ఉంది. అది అవకాశవాదం'' అంటూ రాజ్‌దీప్ సర్దేశాయ్ ట్వీట్ చేశారు.

అవినీతి:
మహారాష్ట్రలోని రాజకీయ పరిస్థితులు అచ్చంగా సర్దేశాయ్ ట్వీట్‌లో చెప్పినట్లే ఉన్నాయి. అజిత్ పవార్‌ అండతో సీఎంగా ప్రమాణ స్వీకారం చేసిన ఫడణవీస్ ఎన్నికలకు ముందు అజిత్ పవార్ ఇరిగేషన్ ప్రాజెక్టుల్లో అక్రమాలు చేసి 70 వేల కోట్లు తిన్నారంటూ ఆరోపణలు చేశారు. దీనిపై ఈడీ కేసులూ నమోదయ్యాయి. కానీ, ఇప్పుడు అదే అజిత్ పవార్ ఎన్సీపీని చీల్చి బీజేపీకి(ఫడణవీస్) మద్దతిచ్చారు. ఫడణవీస్ సీఎంగా, అజిత్ పవార్ డిప్యూటీ సీఎంగా ప్రమాణం చేశారు. అయితే, ఇంత చేసినా బలం నిరూపించుకోలేక రాజీనామా చేయడం వేరే విషయం.

లౌకికత్వం:
ఇక మహా ఎపిసోడ్‌లో చెప్పుకోవాల్సిన మాట శివసేన, కాంగ్రెస్‌లు కలిసి ప్రభుత్వాన్ని ఏర్పాటు చేయాలనుకోవడం. హిందూత్వకు బీజేపీ కంటే పెద్ద బ్రాండ్ అంబాసిడర్‌గా పేరుంది శివసేనకు. ఇక కాంగ్రెస్ ఈ విషయంలో శివసేనను దశాబ్దాలుగా విమర్శిస్తూనే ఉంది. శివసేనది హిందూ ఉగ్రవాదం అని కూడా కాంగ్రెస్ నాయకులు ఎన్నోసార్లు ఆరోపించారు. కానీ, ఇప్పుడు అదే పార్టీతో కాంగ్రెస్ జట్టుకట్టి ప్రభుత్వం ఏర్పాటు చేయాలని ప్రయత్నించింది. ఫడణవీస్ రాజీనామాతో శివసేన నేతను సీఎం చేయబోతున్నారు.
ఈ దెబ్బతో కాంగ్రెస్‌కు ఇంతవరకు ఉన్న సెక్యులర్ ముద్ర పూర్తిగా పోయినట్లేనని చెప్పాలి. ఇకపై బీజేపీని మతతత్వ పార్టీ అంటూ విమర్శించే అర్హతను కాంగ్రెస్ కోల్పోయిందనే చెప్పాలి. శివసేనకి చేయి అందించిన తరువాత ఆ పార్టీ ముందు మతం విషయంలో బీజేపీ చాలా చిన్నదే.

హిందూత్వం:
ఇక ఈ వ్యవహారంలో శివసేన గురించి ఎంత మాట్లాడుకున్నా తక్కువే. పులి లాంటి ఆ పార్టీ ముఖ్యమంత్రి పదవి కోసం వేసిన పిల్లిమొగ్గలతో పూర్తిగా పరువు పోగొట్టుకుంది. అంతేకాదు.. హిందూమతానికి పొలిటికల్ బ్రాండ్ అయిన ఆ పార్టీ ఇప్పుడు సెక్యులరిజం పేరుతో హిందూ వ్యతిరేక వర్గాలను నెత్తిన పెట్టుకునే కాంగ్రెస్ మద్దతు కోసం అర్రులు చాచింది. కాంగ్రెస్ సాయంతో శివసేన ప్రభుత్వాన్ని ఏర్పాటు చేయబోతోంది. దీంతో శివసేన ధర్మం వీడిందన్న వాదన అంతటా వినిపిస్తోంది.

ప'వార్స్': ఎన్నికల ఫలితాలు వచ్చిన వెంటనే బీజేపీ, శివసేనలకు కలిపి మ్యాజిక్ ఫిగర్ కనిపించడంతో అధికారంపై ఆశలు వదులుకున్న నేషనలిస్ట్ కాంగ్రెస్ పార్టీ నేతలకు అనంతర పరిణామాలు బాగా కలిసొచ్చాయి. బీజేపీ, శివసేనలు సీఎం సీటు కోసం పట్టుదలకు పోవడం.. శివసేన ఎన్సీపీతో కలవాలనుకోవడంతో ఎన్సీపీ అధినేత శరద్ పవార్ కీలకంగా మారారు. ఆయన శివసేన నేతలు, అటు సోనియా, మరో వైపు ప్రధాని మోదీనీ కలిశారు. ఎన్సీపీ, కాంగ్రెస్, శివసేన కలిసి ప్రభుత్వాన్ని ఏర్పాటు చేస్తాయనీ చెప్పారు.

అయితే, అంతలోనే ఎన్సీపీలో నంబర్ 2గా చెలమణీ అయ్యే అజిత్ పవార్(శరద్ పవార్ అన్న కుమారుడు) రాత్రికి రాత్రి బీజేపీకి మద్దతు పలికి శనివారం ఉదయం ఏకంగా డిప్యూటీ సీఎంగా ప్రమాణ స్వీకారమూ చేసేశారు. దీంతో ఎన్సీపీలో శరద్ పవార్ శివసేనకు మా మద్దతు ఉంటుందని చెబుతుంటే అజిత్ పవార్‌ ఏకంగా బీజేపీతో కలిశారు. ఇప్పుడాయన ఫడణవీస్2తో పాటు రాజీనామా చేశారు.

ఇదంతా ఎలాంటి ఫలితమిచ్చిందన్నది పక్కన పెడితే బీజేపీకి అజిత్ పవార్ మద్దతు పలికాకే ఆయనపై ఈడీ కేసులు కొట్టేశారన్నది.. శరద్ పవార్ ప్రధాని మోదీని కలిశాకే అజిత్ పార్టీని చీల్చి బీజేపీకి మద్దతు పలికారన్నది మాత్రం నిజం.

ఇదంతా చూస్తే అడుగడుగునా అవకాశవాదమే కనిపిస్తుంది. సీఎం సీటు కోసం బీజేపీతో ఎన్నికల ముందు నాటి మైత్రిని శివసేన తెంచుకోవడం.. కాంగ్రెస్‌తో కలవడం.. బీజేపీని అధికారంలోకి రాకుండా చేయడం కోసం కాంగ్రెస్ శివసేనతో కలవడం.. శివసేన, కాంగ్రెస్, ఎన్సీపీలు కలిసి ప్రభుత్వం ఏర్పాటు చేయకుండా ఎన్సీపీలోని ఓ వర్గం సపోర్టుతో బీజేపీ ప్రభుత్వం ఏర్పాటు చేయడం వంటివన్నీ అవకాశవాదానికి ప్రతీకలే.  

 

రాజకీయ వార్తలు

 

సినిమా వార్తలు

 
Home
వార్తలు
ఫోటో గ్యాలరీ
English