గూగుల్ ఇంట‌ర్నెట్లో గెలిచి..ఇంట్లో ప‌రువు పోగొట్టుకుంది!

గూగుల్ ఇంట‌ర్నెట్లో గెలిచి..ఇంట్లో ప‌రువు పోగొట్టుకుంది!

గూగుల్‌..సెర్చింజ‌న్ దిగ్గ‌జం అని మాత్ర‌మే కాకుండా...ఉద్యోగం చేయాల‌నుకునేవారికి ప్ర‌పంచ‌వ్యాప్తంగా అత్యుత్త‌మ‌మైన వేదిక అనే పేరున్న సంస్థ కూడా. అయితే, తాజాగా సంస్థ విధానాల‌కు వ్యతిరేకంగా ఉద్యోగుల నిరసన ప్రదర్శన ఇంటర్నెట్ దిగ్గజం గూగుల్‌ను కుదిపేసింది. సహేతుక కారణం లేకుండానే ఇద్దరు ఉద్యోగులను సెలవుపై పంపడమేంటని ప్రశ్నిస్తూ.. శాన్‌ఫ్రాన్సిస్కోలోని గూగుల్‌ ప్రధాన కార్యాలయం ముందు ఆ సంస్థకు చెందిన ఉద్యోగులు ఆందోళన నిర్వహించారు. దాదాపు 200 మందికిపైగా ఉద్యోగులు యాజమాన్యానికి వ్యతిరేకంగా ఈ నిరసన చేపట్టారు. గతంలో ఎన్నడూ ఉద్యోగుల ఆందోళనను చవిచూడని గూగుల్ యాజమాన్యం... తాజా ఘ‌ట‌న‌ల‌తో షాక్ అయింది.

ఈ నెల తొలివారంలో గూగుల్‌ యాజమాన్యం లారెన్స్‌ బర్లాండ్‌, రెబెక్కా రివర్స్‌ అనే ఇద్దరు ఉద్యోగులను బలవంతంగా నిరవధిక సెలవుపై పంపించింది. వీరి కోసం సంస్థ ఉద్యోగులు రోడ్డెక్కారు. సెలవుపై పంపిన ఇద్దరిని తిరిగి విధుల్లోకి తీసుకోవాలని డిమాండ్‌ చేశారు. ‘ఈ సంస్థ మాది’, ‘తీసేసిన వాళ్లను వెంటనే వెనక్కి రప్పించండి’ అంటూ నినాదాలు చేశారు.

‘గత కొంతకాలంగా సంస్థలో జరుగుతున్న లైంగిక వేధింపులపై చర్యలు తీసుకోవాలని సంస్థకు వివరించాం. అలాగే, ఆఫీసు పని వేళలు, ఇతరత్రా అంశాల్లో కొన్ని సంస్కరణలు చేయాలని విజ్ఞప్తి చేశాం. మా అభ్యర్థనను యాజమాన్యం పెడచెవిన పెట్టడమే గాకుండా మా నోరు నొక్కే ప్రయత్నం చేస్తూ బెదిరింపులకు పాల్పడుతున్నది. యాజమాన్యం వైఖరిని తప్పుపడుతూ.. ప్రశ్నించిన వారిని సెలవు పేరుతో ఉద్యోగం నుంచి తీసేస్తున్నారు’ అని సంస్థలో పనిచేస్తున్న జాక్‌ జొరాతంగ్‌ తెలిపారు. ఇదిలాఉండ‌గా, కంపెనీ పాలసీకి అనుగుణంగా వారి ప్రవర్తనలేదన్న కారణంతోనే తాము ఈ నిర్ణయం తీసుకున్నామని గూగుల్‌ ఓ ప్రకటనలో వివరించింది.

మ‌రోవైపు గూగుల్‌లో ఉద్యోగులు రోడ్డెక్క‌డం ఇదే తొలిసారి కాదు. గ‌త ఏడాది స‌రిగ్గా న‌వంబ‌ర్‌లోనే ఇలాంటి ఘ‌ట‌న జ‌రిగింది. పనిప్రదేశాల్లో లైంగిక వేధింపులు, మహిళా ఉద్యోగులపై వివక్షకు వ్యతిరేకంగా ఉద్యోగులు నిరసన ప్రదర్శన చేశారు. గూగుల్ సంస్థ‌ల్లో కొంతమంది మహిళా ఉద్యోగులు లైంగిక వేధింపులకు గురవుతున్నారని, ఆరోపణలు ఎదుర్కొంటున్న సంస్థ ఉన్నతాధికారులకు గూగుల్ భారీ ప్యాకేజీలతో వీడ్కోలు పలికిందని, అలాంటి వారికి కోట్ల డాలర్ల ఆకర్షణీయమైన ప్యాకేజీలు ఇచ్చి మరీ గూగుల్ సాగనంపిందని న్యూయార్క్ టైమ్స్ పత్రిక ఆధారాలతో బయటపెట్టింది.

దీంతో భారత్ సహా పలు దేశాల్లో  వందల మంది గూగుల్ ఉద్యోగులు తమ కార్యాలయాల నుంచి వాకౌట్ చేశారు. వేధింపుల ఆరోపణలు ఎదుర్కొంటున్న ఉన్నతాధికారులపై యాజమాన్యం తగిన చర్యలు తీసుకోలేకపోయిందని ఆరోపించారు. ఉద్యోగుల ప్రతినిధులను బోర్డులోకి తీసుకోవాలని, వేధింపులపై వచ్చిన ఫిర్యాదులను సత్వరమే పరిష్కరించాలని గూగుల్ మాతృసంస్థ అల్ఫాబెట్‌ను డిమాండ్ చేశారు.

 

రాజకీయ వార్తలు

 

సినిమా వార్తలు

 
Home
వార్తలు
ఫోటో గ్యాలరీ
English