అప్పుల్లో కెప్టెన్.. ఆస్తుల వేలానికి రంగం సిద్ధం!

అప్పుల్లో కెప్టెన్.. ఆస్తుల వేలానికి రంగం సిద్ధం!

ప్ర‌ముఖ సినీ న‌టుడు.. డీఎండీకే అధినేత.. త‌మిళులు ప్రేమ‌గా కెప్టెన్ అని పిలుచుకునే విజ‌య‌కాంత్ ఆర్థిక ఇబ్బందుల్లో కిందామీదా ప‌డుతున్నారు. ఆయ‌న అప్పుల్లో మునిగిపోయిన‌ట్లుగా చెబుతున్నారు. బ్యాంకుకు చెల్లించాల్సిన రూ.5.5కోట్ల మొత్తాన్ని రాబ‌ట్టుకోవ‌టంతో విజ‌య‌కాంత్ ఆస్తుల్ని వేలం వేసేందుకు సిద్ధ‌మైన‌ట్లుగా బ్యాంకు ప్ర‌కటించ‌టం సంచ‌ల‌నంగా మారింది.

ఈ మ‌ధ్య‌న తీవ్ర అనారోగ్యానికి గురైన విజ‌య‌కాంత్ చికిత్స కోసం అప్పులు చేసిన‌ట్లుగా తెలుస్తోంది. దీనికి తోడు రాజ‌కీయ పార్టీ కోసం నిధులు తేవాల్సి వ‌చ్చిన‌ట్లుగా చెబుతున్నారు. దీంతో.. ఆయ‌న ఆర్థిక ఇబ్బందుల్లోకి కూరుకుపోయిన‌ట్లుగా స‌మాచారం. ఈ నేప‌థ్యంలో ఇండియ‌న్ ఓవ‌ర్సీస్ బ్యాంకు నుంచి అప్పు తీసుకున్నారు.  ప‌లు సంద‌ర్భాల్లో తీసుకున్న అప్పు తాజాగా రూ.5.5 కోట్లుగా మారింది.

అయితే.. ఈ అప్పు కింద ష్యూరిటీగా చెన్నై శివారులోని ఆండాళ్ల ఇంజినీరింగ్ కాలేజీని.. సాలిగ్రామంలోని మ‌రో ఇంటిని త‌న‌ఖా పెట్టారు. గ్యారెంటీగా ఉంటామంటూ విజ‌య‌కాంత్ భార్య ప్రేమ‌ల‌త కూడా సంత‌కాలు చేశారు. స‌కాలంలో అప్పు చెల్లించ‌ని నేప‌థ్యంలో బ్యాంకు గ్యారెంటీగా పెట్టిన ఆస్తుల్ని వేలం వేయాల‌ని బ్యాంకు నిర్ణ‌యించింది. ఇందులో భాగంగా తాజాగా బ‌హిరంగ ప్ర‌క‌ట‌న ద్వారా విజ‌య‌కాంత్ ఆస్తుల్ని తాము వేలం వేయ‌నున్న‌ట్లుగా ప్ర‌క‌టించింది.

దీంతో ఒక్క‌సారిగా విజ‌య‌కాంత్ ఆర్థిక స‌మ‌స్య‌ల వ్య‌వ‌హారం తెర మీద‌కు వ‌చ్చి.. ప‌లువురు ఆశ్చ‌ర్య‌పోయే ప‌రిస్థితి నెల‌కొంది.  ఈ వార్త మీడియాలోనూ.. సోష‌ల్ మీడియాలోనూ సంచ‌ల‌నంగా మారింది. రూ.5.5 కోట్ల మొత్తం పెద్ద‌ది కాకున్నా.. ఆ మొత్తాన్ని స‌ర్దుబాటు చేయ‌లేని ప‌రిస్థితుల్లో కెప్టెన్ ఉన్నారా? అన్న‌ది ప్ర‌శ్న‌గా మారింది. ఇదిలా ఉంటే.. బ్యాంకు ప్ర‌క‌ట‌న నేప‌థ్యంలో విజ‌య‌కాంత్ స‌తీమ‌ణి స్పందించారు. ఆస్తులు పోకుండా తాము బ్యాంకు అప్పును తీరుస్తామ‌ని ఆమె చెప్పారు. విజ‌య‌కాంత్ జీవితం తెరిచిన పుస్త‌క‌మ‌ని.. ఆయ‌న సినిమాలు చేయ‌క‌పోవ‌టం.. ఆరోగ్యానికి.. పార్టీ అవ‌స‌రాల‌కు ఖ‌ర్చు చేయాల్సి రావ‌టంతో అప్ప‌లు చేశార‌న్నారు. ఎలాంటి కెప్టెన్ ఎలా అయ్యార‌న్న ఆవేద‌న‌ను ఆయ‌న అభిమానులు ప‌లువురు వ్య‌క్తం చేస్తున్నారు.


 

రాజకీయ వార్తలు

 

సినిమా వార్తలు

 
Home
వార్తలు
ఫోటో గ్యాలరీ
English