69 ల‌క్ష‌ల ఓట్లు హుష్‌..

తెలంగాణలో కేంద్ర ఎన్నికల సంఘం చేపట్టిన… స్పెషల్ ఇంటెన్సివ్ రివిజన్‌(సర్‌)లో 73 లక్షల మంది ఓట్లు గల్లంతయ్యాయి. ఇది జరిగి 40 రోజులు అయిపోయింది. ఆ తర్వాత.. మళ్లీ కొత్తగా ఓటర్లుగా నమోదు చేసుకునేందుకు అవకాశం కల్పించాలని నిర్ణయించారు. అదేసమయంలో సర్ ప్రక్రియలో ఓట్లు గల్లంతైన వారికి కూడా అవకాశం కల్పించారు. వారు కూడా ప్రత్యేక ఫారాలు సమర్పించి 2002 నాటి సర్ జాబితాలోని వివరాలను అందించి.. కొత్తగా ఓటు హక్కు పొందే అవకాశం ఇచ్చారు. ఈ ప్రక్రియకు అక్టోబరు 7(బుధవారం)తో గడువు పూర్తవుతుంది. దీనికి సంబంధించి తెలంగాణ ఎన్నికల సంఘం కీలక ప్రకటన చేసింది.

73 లక్షల 39 వేల ఓట్లను తాము తొలగించామని.. వీరిని కొత్తగా 2002 నాటి జాబితా వివరాలతో నమోదు చేసుకోవాలని కోరామని అధికారులు వెల్లడించారు. కానీ, కేవలం 4 లక్షల 64 వేల మంది మాత్రమే తిరిగి దరఖాస్తు చేసుకున్నారని పేర్కొన్నారు. అంటే.. సుమారు 69 లక్షల 50 వేల మంది అనర్హులయ్యారు. దీంతో వీరి ఓట్లు పూర్తిగా తొలిగిపోయాయి. దీంతో రాష్ట్ర వ్యాప్తంగా ఓటర్ల సంఖ్యలో వీరి నెంబరు లేకుండా పోతుంది. ఇది హైదరాబాద్ సహా ఉత్తర తెలంగాణ జిల్లాల్లోనే ఎక్కువగా ఉన్నట్టు ఎన్నికల సంఘం పేర్కొంది. ఒకరకంగా ఇది రాజకీయంగా కూడా వివాదం అయ్యే అవకాశం ఉంది.

ఇక‌, ఏం చేయాలి?

ప్రస్తుత సర్ జాబితాలో పేర్లు పోయిన వారు మరోసారి కొత్తగా ఓటరుగా నమోదు చేసుకునేందుకు అవకాశం ఉంది. ఈ క్రమంలో వారు మరోసారి ఫాం-6ను ఇవ్వాల్సి ఉంటుంది. ఇది కూడా గతంలో కంటే భిన్నంగా ఉన్న నేపథ్యంలో సానుకూలంగానే వారికి హక్కు లభించే అవకాశం ఉంటుందని అధికారులు చెబుతున్నారు. ఇక‌, 11వ తేదీ వరకు గత సర్ జాబితాలపై అభ్యంతరాలు తీసుకునే అవకాశం ఉన్నా.. ప్రచారం సరైన విధంగా లేకపోవడంతోనే లక్షలాది మంది నష్టపోయే ప్రమాదం ఏర్పడిందని తెలుస్తోంది. ఇక‌, రాష్ట్రంలో ఎంత మంది ఓటర్లు ఉన్నారు? సంఖ్య ఎంత? అనేది ఈ నెల 9న తుది జాబితా విడుదల కానుంది.