టీడీపీ, వైసీపీ కలిస్తే?… ఊహకే అందట్లేదా?

టీడీపీ ఏంటీ… వైసీపీతో కలిసి పోటీ చేయడమేమిటి? వైసీపీ ఏంటీ…పోయిపోయి టీడీపీతో జత కట్టడేమేమిటి?. నిజమేనండోయ్.. ఈ ఈక్వేషన్ ఊహకే అందట్లేదు. అయితే ఖమ్మం జిల్లా సారపాక వెళితే… అక్కడ ఈ రెండు పార్టీలకు చెందిన జెడాలు కలిసిమెలిసి సాగుతున్న అరుదైన దృశ్యాలను చూడవచ్చు. అక్కడి ఐటీసీ కంపెనీలో ఇప్పుడు గుర్తింపు కార్మిక సంఘం ఎన్నికలు జరుగుతున్నాయి. ఈ ఎన్నికల్లో కాంగ్రెస్ నేతృత్వంలోని ఐఎన్టీయూసీని ఓడించేందుకు టీడీపీ కార్మిక సంఘం టీఎన్డీయూసీ… వైసీపీతో కలిసి సాగుతోంది.

ఖమ్మం జిల్లా అంటే తెలిసిందే కదా. జిల్లా తెలంగాణలో ఉన్నా… ఆంధ్రా మూలాలు బాగానే ప్రభావితం చేస్తున్నాయి. 2014 ఎన్నికల్లో వైసీపీ ఓ ఎంపీ సీటుతో పాటు 3 అసెంబ్లీ సీట్లను గెలిచిందిక్కడే. ఆ తర్వాత 2018లో తెలంగాణ వ్యాప్తంగా ఓడినా.. టీడీపీకి రెండు అసెంబ్లీ సీట్లు కూడా దక్కింది ఈ జిల్లాలోనే. ఆ తర్వాత అటు వైసీపీ విజేతలు గానీ, ఇటు టీడీపీ విన్నర్లు గానీ…ఆ పార్టీలను వదిలివెళ్లిన సంగతి తెలిసిందే. అంటే.. ఎన్ని వేరియేషన్లు ఉన్నా… ఆంధ్రా మూలాలు ఉన్న పార్టీలకు ఈ జిల్లాలో ఇంకా అంతో ఇంతో పట్టు ఉన్నట్లే లెక్క.

ఇక సారపాక ఐటీసీ కంపెనీ విషయానికి వస్తే… కంపెనీలో మెజారిటీ కార్మికులు ఆంధ్రా మూలాలు ఉన్న వారే. కంపెనీలో మొత్తం 5 వేల మంది దాకా కార్మికులు ఉన్నా…గుర్తింపు సంఘం ఎన్నికల్లో ఓటు హక్కు ఉన్న వారు మాత్రం 1,253 మందే ఉన్నారట. నాలుగేళ్లకు ఓసారి ఎన్నికలు జరుగుతుండగా… గతంలో కూడా వైసీపీ మద్దతు తీసుకుని టీటీడీ విక్టరీ కొట్టేసింది. ఈ సారి కూడా అదే వ్యూహాన్ని టీడీపీ అమలు చేస్తుండగా… వైసీపీ అందుకు సరేనంది. ఇంకేముంది గత ఫలితం రిపీట్ అయినట్టేనన్న ధీమాతో ఈ రెండు పార్టీలు సాగుతున్నాయి.

ఇక కాంగ్రెస్ ఆధ్వర్యంలోని ఐఎన్టీయూసీ గతంలో మాదిరిగా కాకుండా ఈ దఫా టీఎన్టీయూసీని ఓడించాలని వ్యూహాలు రచిస్తోంది. అందులో భాగంగా జనసేన మద్దతుదారుల ఓట్లకు గాలం వేసింది. ఏపీలో టీడీపీతో సాగుతున్నా… కాంగ్రెస్ వ్యూహంతో ఇక్కడి జనసేన ఓట్లలో చీలిక వచ్చేసిందట. ఓ వర్గం టీడీపీతోనే ఉండగా… చీలిక వర్గం కాంగ్రెస్ తో జత కట్టిందట. పలితంగా టీడీపీ, వైసీపీ జెండాలు కలిసిపోగా… జనసేన జెండాలు మాత్రం రెండు శిబిరాల్లోనూ కనిపిస్తున్నాయి. అత్యంత ఆసక్తి రేకెత్తిస్తున్న ఈ ఎన్నికల పోలింగ్ శుక్రవారం జరగనుంది. ఫలితం కూడా శుక్రవారం రాత్రికి విడుదల కానుంది.