సమీక్ష…అంటే సుందరానికి

ప్రేమను ఫన్ ను ముడేయచ్చు…అలాగే రొమాంటిక్ ఎమోషనల్ సినిమాలు తీయొచ్చు. కానీ ప్రేమ..ఫన్…ఎమోషన్ ఈ మూడూ కలపాలి అంటే చాలా చాకచక్యం కావాలి. అంతకన్నా ముందుగా అలా తీసి ఒప్పించినా ప్రేక్షకులు ఏ మేరకు ఆదరిస్తారు అన్న ఆలోచన వుండాలి. ఇవన్నీ కాయిన్ కు ఒక వైపు.

ఇవ్వాళ ‘డేటింగ్’ అనే పేరుతో అమ్మాయిలు..అబ్బాయిలు ‘కలిసి పోవడం’ అన్నది కామన్ అయిపోయింది. పెళ్లిళ్లు దేశ సరిహద్దులు దాటేసాయి. ప్రెగ్నన్సీ టెస్ట్ కిట్ లు, కండోమ్ లు చాక్ లెట్ల మాదిరిగా అమ్ముడైపోతున్నాయి. ఇలాంటి ట్రెండ్ నడుస్తుంటే ‘కడుపు రావడం’ ‘కడుపు చేయలేకపోవడం’ అనే పాయింట్లు తీసుకోవడమే ధైర్యం. ఆపైగా ఆ పాయింట్ల చుట్టూనే మూడు గంటల సేపు కథను నడపాలనుకోవడం మరీ ధైర్యం. ఇది కాయిన్ కు మరో వైపు.

ఇలాంటి చిత్రమైన కాయిన్ నే…’ అంటే సుందరానికి…’ సినిమా. సంప్రదాయ బ్రాహ్మణ కుటుంబంలోని అబ్బాయి… ఆర్థడాక్స్ క్రిస్టియన్ ఫ్యామిలీలోని అమ్మాయి..ప్రేమించుకుంటే, ఇంట్లో వచ్చే అడ్డంకులను తప్పించుకోవడం కోసం చెరో అబద్దం ఆడితే, ఆ రెండు అబద్దాలు కలిసి పెద్ద చిక్కుముడిగా మారిపోతే…అదీ అంటే సుందరానికి… కథ.

అంటే సుందరానికి సినిమా ఎలా వుందీ అని అడిగితే సమాధానం చెప్పడానికే ‘అంటే..అంటే..అంటే..’ అంటూ కాస్సేపు తడుముకోవాల్సి వస్తుంది. ఎందుకంటే వెంటనే చెప్పడం సాధ్యం కాదు కనుక. సినిమాలో కొన్ని ఫన్ మూమెంట్స్ వున్నాయి. కాదనడానికి లేదు. అలాగే మంచి బ్యాక్ గ్రవుండ్ స్కోర్ వుంది. దర్శకుడు రాసుకున్న పేజీలకు పేజీల డైలాగులు వున్నాయి. వాటిలో కొన్ని నవ్వించాయి. మరి కొన్ని ఆలోచించేలా చేసాయి. ఇంకొన్ని తల పట్టుకునేలా మార్చాయి. హీరో నాని తనదైన స్టయిల్ లో నవ్వులు పూయించాడు. కానీ భావొద్వేగాలు, చిక్కుముడులు కూడా కలిసి లెక్కేసుకుంటే ఈ ఫన్ మూమెంట్స్ డయిల్యూట్ అయిపోతాయి.

దాదాపు మూడుగంటల నిడివి వున్న అంటే సుందరాని… రెగ్యులర్ గా సినిమాలు చూసే ఏ ఆడియన్ చేతికి కత్తెరె ఇచ్చినా, ఒకటి రెండు ప్యాచ్ వర్క్ లు చేసి, సినిమా నిడివిని కనీసం 15 నిమషాలు తగ్గించేయగలడు. దానికి పెద్ద ఎడిటింగ్ విద్య అవసరం లేదు. దర్శకుడు వివేక్ ఆత్రేయ ఓ పక్క ఇంటలెక్చువల్ గా కథ చెప్పే ప్రయత్నం చేస్తూనే, ప్రధాన కథకు అవసరం లేని చాలా అంటే చాలా విషయాలు కథలోకి లాగేసాడు. హీరోయిన్ అక్క వ్యవహారాలు, హీరోయిన్ మొదటి ప్రేమ వ్యవహారం, పదే పదే హర్షతో సిటింగ్ లు, హీరో మోడలింగ్ వ్వవహారాలు, ఇలా చాలా వున్నాయి. అన్నింటికి మించి చైల్డ్ ఎపిసోడ్ ను అంత సేపు చూపించడం, శేఖర్ మాస్టర్ కొడుకు కదా అని చెప్పి ఏకంగా పాటే పెట్టేయడం కూడా.

సినిమా తొలిసగం ఫన్ మూమెంట్స్ ను ఎక్కువగా ఒడిసి పట్టింది. ఓకె అనిపించుకుంది. మలి సగం మాత్రం అటు ఫన్ ను, ఇటు ఎమోషన్ ను బ్యాలన్స్ చేయలేకపోయింది. ప్రతీదీ సవివరంగా చెప్పాలనే రంథిలో పడి లెంగ్త్ ను పెంచేసుకున్నాడు.

ఇలాంటి సినిమాలో హీరో గా నానికి నూటికి నూరు మార్కులు పడిపోతాయి. కానీ హీరోయిన్ గా నజ్రియాను కోరి తెచ్చుకున్నారు. కానీ గ్లామరస్ హీరోయిన్ గా మాత్రం అనిపించదు. మార్కులు తెచ్చుకోదు. గెస్ట్ గా కనిపించిన అనుపమ బాగుంది. నరేష్, రోహిణిల నటన బాగుంది.

సినిమా టెక్నికల్ గా చూసుకుంటే వివేక్ సాగర్ బ్యాక్ గ్రవుండ్ స్కోర్ బాగుంది. కానీ ఒక్క పాట కూడా సరిగ్గా చేయలేకపోయారు. దర్శకుడు రాసుకున్న సంభాషణలు బాగున్నాయి. సినిమాటోగ్రఫీ ఓకె.

మొత్తం మీద చిన్న పాయింట్ ను పట్టుకుని, కావాల్సినన్ని, అక్కరలేనన్ని చిక్కుముడులు వేసి, మేధావితనం రంగరించి, కొత్తగా చెప్పాలని ప్రయత్నించి, ఆ ప్రయత్నంలో కొంత వరకు విజయం సాధించిన సినిమా…’అంటే సుందరానికి..’

ప్లస్ పాయింట్లు

ఫన్ సీన్లు

డైలాగులు

నేపథ్యసంగీతం

మైనస్ పాయింట్లు

సాగదీత

లెంగ్త్

ఫినిషింగ్ టచ్: అంటే..ఫన్ విత్ ఎమోషన్

Rating: 3/5