త్వరగా తేల్చవయ్యా తండేల్

నాగచైతన్య తండేల్ విడుదల తేదీ తాలూకు డోలాయమానం కొనసాగుతోంది. నితిన్ రాబిన్ హుడ్ డిసెంబర్ 20 ప్రకటించారు కాబట్టి ఇది కూడా అదే డేట్ కి రావొచ్చనే ఊహాగానాలు పరిశ్రమలో బలంగా రేగాయి. కానీ దానికి భిన్నంగా ఎలాంటి ప్రకటన రాలేదు.

అప్పటికంతా పోస్ట్ ప్రొడక్షన్ అయిపోయి ఫస్ట్ కాపీ సిద్ధం చేసే పరిస్థితి లేదని దర్శకుడు చందూ మొండేటి చెప్పడం వల్లే అనౌన్స్ మెంట్ ఆగిపోయిందని ఇంకో టాక్ ఉంది. తాజాగా తండేల్ 2025 సంక్రాంతికి వస్తోందనే వార్త రావడంతో ఒక్కసారిగా అక్కినేని అభిమానులు యాక్టివేట్ అయిపోయి ట్రెండింగ్ చేయడం మొదలుపెట్టారు.

ఇటీవలే బన్నీ వాస్ ఒక ఇంటర్వ్యూలో మాట్లాడుతూ తండేల్ ని ఎక్కువ కాలం హోల్డ్ చేసే పరిస్థితి లేదని ఈ ఏడాది చివరిలో లేదా జనవరిలో ఖచ్చితంగా రిలీజ్ చేయాలని అన్నారు. ఆ మాట ప్రకారం చూసుకుంటే క్రిస్మస్ లేదా సంక్రాంతి రెండు ఆప్షన్లు మాత్రమే ఉన్నాయి.

అయితే గేమ్ ఛేంజర్, బాలయ్య 109, వెంకటేష్ – అనిల్ రావిపూడి చిత్రం, సందీప్ కిషన్ మజాకాలు అధికారికంగా రేసులో ఉండగా తండేల్ లాంటి కంటెంట్ ఉన్న మూవీకి థియేటర్ల పరంగా ఇబ్బందులు రావొచ్చు. గీతా ఆర్ట్స్ కు ఎంత నెట్ వర్క్ ఉన్నా కాంపిటీషన్ లో ఉన్న నిర్మాతలు తక్కువైనోళ్లు కాదు.

సరే బాగుంటే మూడు నాలుగు సినిమాలు సులభంగా ఆడతాయి కాబట్టి తండేల్ సంక్రాంతికే వస్తుందని అనుకున్నా ముందైతే వీలైనంత త్వరగా తేల్చి చెప్పడం బెటర్. ఎందుకంటే దానికి అనుగుణంగా ప్రమోషన్లు మొదలుపెట్టాల్సి ఉంటుంది. వరస డిజాస్టర్లతో డీలా పడ్డ చైతు ఈ సినిమా కోసం చాలా కష్టపడ్డాడు.

శారీకరంగా శ్రమ తీసుకోవడంతో పాటు హెయిర్ స్టైల్ నెలల తరబడి అలాగే మెయిటైన్ చేస్తున్నాడు. సాయిపల్లవితో రెండోసారి జత కట్టడం, దేవిశ్రీ ప్రసాద్ సంగీతం లాంటి ఆకర్షణలు ఇందులో బోలెడున్నాయి. ఎక్కువ సస్పెన్స్ లేకుండా కుండ బద్దలు కొట్టమని చైతు ఫ్యాన్స్ డిమాండ్.