నితిన్ చెప్పేశాడు….ఇక చైతునే బాకీ

డిసెంబర్ బరిలో నుంచి గేమ్ ఛేంజర్ తప్పుకోవడంతో ఒక్కసారిగా ఇతర నిర్మాతలు అలెర్ట్ అయిపోయారు. వాయిదా వేయడానికి గల కారణాలు దిల్ రాజు స్పష్టంగా వివరించారు. ముందు అనుకున్న ప్రకారం అయితే చరణ్ డిసెంబర్ 20 లేదా 25 రావాలి. మొన్నటి దాకా ఇదే ధీమాతో ఎస్విసి టీమ్ ఉండటంతో మిగిలిన ప్రొడ్యూసర్లు ఆ డేట్ మీద ఆశలు వదులుకున్నారు. ఇప్పుడు ఆ స్లాట్ ఖాళీ కావడంతో ఒక్కక్కరుగా ఈ అవకాశాన్ని అందిపుచ్చుకోవడానికి రెడీ అవుతున్నారు. నితిన్ రాబిన్ హుడ్ డిసెంబర్ 20 వరల్డ్ వైడ్ గ్రాండ్ రిలీజ్ చేయబోతున్నట్టు కొత్త పోస్టర్ తో మైత్రి సంస్థ అనౌన్స్ మెంట్ ఇచ్చేసింది.

వెంకీ కుడుముల దర్శకత్వంలో రూపొందుతున్న ఈ ఎంటర్ టైనర్ నిజానికి ఎప్పుడో ఈ తేదీని లాక్ చేసుకుంది. కానీ గేమ్ ఛేంజర్ ఎంట్రీతో కొద్దిరోజులు వేచి చూద్దామని ఆగింది. ఇప్పుడు రూట్ క్లియర్ కావడంతో కుండ బద్దలు కొట్టేసింది. ఇక అందరి చూపు నాగ చైతన్య వైపు వెళ్తోంది. తండేల్ కూడా గతంలో డిసెంబర్ 20నే అఫీషియల్ చేసుకుంది. తర్వాత జరిగిన పరిణామాల క్రమంలో డేట్ మార్చుకునే ఆలోచన చేసింది. బన్నీ వాస్ త్వరలోనే నిర్ణయం వెల్లడిస్తామని ఆ మధ్య ఒక ఇంటర్వ్యూలో అన్నారు. మరి ఇప్పుడు రాబిన్ హుడ్ తో పాటు ఒకేరోజు బరిలో దిగుతారా లేదా అనేది వేచి చూడాలి.

పుష్ప 2 ది రూల్ వచ్చిన రెండు వారాలకే రావడంలో కొంత రిస్క్ పొంచి ఉన్నా క్రిస్మస్ సెలవులను దృష్టిలో ఉంచుకోవడం అవసరమే. ఓవర్సీస్ కోణంలో చూసుకుంటే మూడు పెద్ద హాలీవుడ్ మూవీస్ వస్తున్నాయి కాబట్టి విదేశాల్లో స్క్రీన్ కౌంట్ పరంగా రాబిన్ హుడ్ రాజీ పడాల్సి ఉంటుంది. తేరి రీమేక్ గా వస్తున్న బాలీవుడ్ సినిమా బేబీ జాన్ కూడా కొంత ప్రభావం చూపించే అవకాశం లేకపోలేదు. సో తండేల్ ఏం చెప్పబోతోందో వేచి చూడాలి. ఒకవేళ పాత మాటకే కట్టుబడి ఇరవైకి వస్తుందా లేక జనవరికి షిఫ్ట్ అవుతుందా అనేది సస్పెన్స్. ప్రస్తుతం తండేల్ షూటింగ్ చివరి దశకు చేరుకుంటోంది.