బెల్లంకొండ‌.. ఇంకో క్రేజీ హీరోయిన్

స్టార్ హీరోయిన్లు మామూలుగా పెద్ద హీరోల సినిమాల్లోనే చేస్తుంటారు. మిడ్ రేంజ్, అప్ క‌మింగ్ హీరోల ప‌క్క‌న వాళ్ల‌ను సెట్ చేయ‌డం అంత తేలిక కాదు. వాళ్ల ఇమేజ్‌కు సూట్ కాద‌ని కావ‌చ్చు.. అలాగే బడ్జెట్ ప‌రిమితుల వ‌ల్ల కావ‌చ్చు.. ఇలాంటి కాంబినేష‌న్లు కుద‌ర‌వు. కానీ బెల్లంకొండ శ్రీనివాస్ సినిమాల్లో మాత్రం ఇది మిన‌హాయింపు. త‌న తొలి చిత్రంలోనే స‌మంత లాంటి టాప్ హీరోయిన్‌తో జ‌ట్టు క‌ట్టాడు. అందులో త‌మ‌న్నా భాటియా ఐటెం సాంగ్ చేసింది. ఆపై ర‌కుల్ ప్రీత్, పూజా హెగ్డే, కాజ‌ల్ అగ‌ర్వాల్.. ఇలా వ‌రుస‌గా టాప్ హీరోయిన్ల‌తో సినిమాలు చేశాడు.

త‌న రేంజికి ఇలాంటి క‌థానాయిక‌ల‌తో జ‌ట్టు క‌ట్ట‌డం ఆశ్చ‌ర్యం క‌లిగించే విష‌య‌మే. కానీ త‌న కోసం తండ్రి బెల్లంకొండ సురేష్‌. భారీ పారితోష‌కాలు ఇచ్చి మ‌రీ స్టార్ హీరోయిన్ల‌ను సినిమాల కోసం సెట్ చేస్తుంటాడని ఇండ‌స్ట్రీలో ఒక టాక్ ఉంది. మ‌ధ్య‌లో కొంచెం రేంజ్ త‌గ్గించి అనుప‌మ ప‌ర‌మేశ్వ‌ర‌న్, న‌భా న‌టేష్ లాంటి మిడ్ రేంజ్ హీరోయిన్ల‌తో సినిమాలు చేశాడు శ్రీనివాస్.

కానీ త‌న కొత్త సినిమాకు మ‌ళ్లీ టాప్ హీరోయిన్‌నే ఎంచుకున్నాడు. భీమ్లా నాయ‌క్, బింబిసార, విరూపాక్ష‌ లాంటి సినిమాల‌తో టాలీవుడ్లోకి దూసుకొచ్చి.. టాప్ హీరోయిన్ అయ్యే దిశ‌గా అడుగులు వేస్తున్న సంయుక్త..శ్రీనివాస్‌కు జోడీగా న‌టించ‌బోతోంది. బుధ‌వారం సంయుక్త పుట్టిన రోజు సంద‌ర్భంగా ఆమె న‌టిస్తున్న కొత్త చిత్రాల నుంచి పోస్ట‌ర్లు రిలీజ్ చేశారు. అందులో స్వ‌యంభుతో పాటు శర్వానంద్ కొత్త సినిమా.. అలాగే బెల్లంకొండ శ్రీనివాస్ మూవీ కూడా ఉన్నాయి.

శ్రీనివాస్ 12వ చిత్రంగా తెర‌కెక్కుతున్న ఈ మూవీని లుధీర్ బైరెడ్డి అనే కొత్త ద‌ర్శ‌కుడు రూపొందిస్తున్నాడు. మ‌హేష్ చందు నిర్మాత‌. ఈ సినిమా నుంచి సంయుక్త మోడ‌ర్న్ లుక్‌ను చిత్ర బృందం ఫ‌స్ట్ లుక్‌గా లాంచ్ చేస్తూ ఆమెకు బ‌ర్త్ డే విష్ చెప్పింది. దీంతో స‌రైన విజ‌యాలు లేక‌పోయినా.. శ్రీనివాస్ మ‌రోసారి టాప్ హీరోయిన్‌తో సినిమా చేస్తున్నాడ‌ని నెటిజ‌న్లు కామెంట్లు చేస్తున్నారు.