ఆ వ్యాఖ్యలపై కమల్ వివరణ

శంకర్-కమల్ హాసన్‌ జోడీ తమ కలయికలో వచ్చిన కల్ట్ బ్లాక్‌బస్టర్ ‘ఇండియన్’కు సీక్వెల్ చేయడం.. అది రెండు భాగాలుగా మారడం.. ముందుగా ఈ నెల 12న ఇండియన్-2 ప్రేక్షకుల ముందుకు రాబోతుండడం తెలిసిందే. ఇండియన్-3 వచ్చే ఏడాది వేసవికి రిలీజ్ కావచ్చని అంచనా వేస్తున్నారు.

కాగా ఇటీవల కమల్ సింగపూర్‌లో జరిగిన ప్రమోషనల్ ఈవెంట్లో మాట్లాడుతూ.. తనకు ఇండియన్-2 కంటే ఇండియన్-3నే ఎక్కువ నచ్చిందని.. అందులోని కథాంశమే తాను ఈ సినిమా చేయడానికి పురిగొల్పిందని వ్యాఖ్యానించడం చర్చనీయాంశమైంది. దీంతో ఇండియన్-2 అంత గొప్పగా ఉండకపోవచ్చని.. కమలే దీని గురించి నెగెటివ్‌గా మాట్లాడాడంటే దీనిపై ఆశలు వదులుకోవాల్సిందేనా అనే చర్చ జరిగింది. ఐతే ఇది సినిమాకు ప్రతికూలంగా మారడంతో కమల్ స్పందించాడు.

‘ఇండియన్-2’ తమిళ ప్రి రిలీజ్ ఈవెంట్లో కమల్ మాట్లాడుతూ.. “నాకు ఇండియన్-3 బాగా నచ్చిందని చెబితే.. దానర్థం ఇండియన్-2 నచ్చలేదని కాదు. మనం భోజనం చేస్తున్నపుడు చివర్లో డెజర్ట్ తినాలనుకుంటాం కదా. ఇండియన్-3 కోసం నేను కూడా అలాగే ఎదురు చూస్తున్నా. ఒక పిల్లాడిని అమ్మ ఇష్టమా, నాన్న ఇష్టమా అని అడిగితే ఎలా ఉంటుంది? ఇది కూడా అలాంటిదే. నేను ఇండియన్-3 ఉండాలని ప్రత్యేకంగా కోరుకోలేదు. ముందు ఇది ఒకే కథ. కాబట్టి ఇండియన్-3 గురించి నా వ్యాఖ్యల్ని అనుసరించి ఇండియన్-2ను తక్కువ చేయొద్దు” అని కమల్ వివరించాడు.

ఇండియన్-2కు ముందు నుంచే బజ్ తక్కువగా ఉండగా.. ట్రైలర్ కూడా ఏమంత ఎగ్జైటింగ్‌గా అనిపించలేదు. దీనికి తోడు కమల్ చేసిన వ్యాఖ్యలతో ఈ సినిమా మీద అంచనాలు ఇంకా తగ్గిపోయినట్లే కనిపిస్తోంది. మరి కమల్ తాజా వ్యాఖ్యలతో ప్రేక్షకుల ఆలోచన మారుతుందేమో చూడాలి.