కమల్ అసలు విధ్వంసం ముందుంది

‘కల్కి’ సినిమాలో అత్యంత ఆసక్తి రేకెత్తించిన పాత్రల్లో కమల్ హాసన్ చేసిన సుప్రీమ్ యాస్కిన్ క్యారెక్టర్ ఒకటి. రిలీజ్‌కు ముందు ఈ పాత్ర మీద మరీ అంచనాలేమీ లేవు. కానీ సినిమాలో దాని ఇంపాక్ట్ బాగానే కనిపించింది. ఐతే కమల్ పాత్రకు స్క్రీన్ టైం చాలా తక్కువ. మహా అయితే ఓ అయిదు నిమిషాలు మాత్రమే కనిపించి ఉంటాడేమో. దానికి రెండే రెండు సీన్లు పెట్టారు. కానీ ఆ రెండు సీన్లలోనూ సుప్రీమ్ యాస్కిన్ పాత్ర ప్రేక్షకులకు ఒక రకమైన భయం కలిగించింది.

తొలి సన్నివేశంలో అక్కడున్నది కమల్ అన్న ఆలోచనే రాని విధంగా అస్థిపంజరం తరహాలో ఆ పాత్ర కనిపించింది. కానీ కమల్ తన గాత్రంతోనే ఆ పాత్ర పట్ల ఒక భయం కలిగేలా చేశాడు. చివరి సన్నివేశంలో ఆయన రూపం మారి కమల్‌ను గుర్తు పట్టేలా కనిపించింది. చివర్లో చెప్పిన డైలాగులు వింటే.. ‘కల్కి-2’లో సుప్రీం యాస్కిన్ పాత్ర మీద అంచనాలు పెరుగుతాయనడంలో సందేహం లేదు.

‘కల్కి’ సినిమా పార్ట్-1లో కమల్ పాత్ర, దాని ప్రభావం తక్కువగానే ఉంటాయని ముందు నుంచే సంకేతాలు వచ్చాయి. ఆ పాత్ర సెకండ్ పార్ట్‌లో ఫుల్ లెంగ్త్‌లో ఉంటుందని.. సినిమా అంతా కమల్ కనిపిస్తారని యూనిట్ వర్గాలు చెప్పాయి. పార్ట్-1లో తక్కువ స్క్రీన్ టైంతోనే సుప్రీం యాస్కిన్ పాత్ర ఇంపాక్ట్ చూపించగలిగింది. కమల్ స్థాయి నటుడికి ఇలాంటి పాత్ర ఇచ్చి.. ఎక్కువ స్క్రీన్ టైం ఇస్తే ఆయన చెలరేగిపోతారనడంలో సందేహం లేదు.

పార్ట్-1లో ప్రభాస్-అమితాబ్ బచ్చన్ పోరు ప్రేక్షకులకు మంచి కిక్ ఇచ్చింది. కానీ అమితాబ్ ఇక్కడ విలన్ కాదు. పార్ట్-2లో కమల్‌తో ప్రభాస్ పోరు ఒక రేంజిలో ఉంటుందని అంటున్నారు. పైగా అక్కడ ప్రభాస్ పోరాడేది విలన్‌తో. కాబట్టి తెర మీద భారీ విధ్వంసమే చూడబోతున్నామన్నమాట. సినిమాకు వారి ఫైటే మేజర్ హైలైట్‌గా నిలిచే అవకాశాలున్నాయి.