పిల్ల దెయ్యం మెల్లగా హిట్టు కొట్టేసింది

గత ఏడాది షారుఖ్ ఖాన్ ఇచ్చిన రెండు ఇండస్ట్రీ హిట్లు, యానిమల్ లాంటి బ్లాక్ బస్టర్ తో బాలీవుడ్ 2023 కళకళలాడింది. కానీ ఈ సంవత్సరం అలాంటి సక్సెస్ లేక ఎగ్జిబిటర్లు చూస్తున్న నరకం అంతా ఇంతా కాదు. షైతాన్, ఫైటర్ మంచి వసూళ్లు నమోదు చేయగా క్రూ లాంటి మీడియం బడ్జెట్ చిత్రాలు నిర్మాతలను ఊపిరి పీల్చుకునేలా చేశాయి. అయితే ఇవన్నీ స్టార్లున్న సినిమాలు. ఇమేజ్, గ్లామర్ పుష్కలంగా ఉన్న నటీనటులు చేసినవి. కానీ అలాంటి ఆకర్షణలు లేకుండా ఒక పిల్ల దెయ్యం చుట్టూ నడిపించిన కథతో హిట్టు కొట్టడం సులభం కాదు. ముంజ్య అది చూపించింది.

ఇదో వెరైటీ స్టోరీ. తల్లి కట్టుబాట్ల మధ్య పెరిగిన బిట్టు(అభయ్ వర్మ) అనే కుర్రాడు ఆమెతో కలిసి స్వంత ఊరికి ఒక పెళ్లి కోసం బయలుదేరతాడు. అక్కడ ముంజ్య అని పిల్ల దెయ్యం దేని కోసమో ఎదురు చూస్తూ ఉంటుంది. బిట్టుని చూడగానే అతనికి మాత్రమే కనిపిస్తూ విచిత్రమైన హింస పెడుతుంది. దీని వెనుక 1950 నాటి ఫ్లాష్ బ్యాక్ ఉంటుంది. మున్ని అనే అమ్మాయిని ప్రేమించిన ముంజ్య పెళ్లి చేసుకోవాలనే కోరిక తీరకుండా చిన్న వయసులోనే ఒక ప్రమాదంలో కన్ను మూస్తాడు. అక్కడే దెయ్యంగా మారి తిరుగుతూ ఉంటాడు. బిట్టుని చూడగానే ఎందుకు వచ్చాడనేది అసలు స్టోరీ.

విఎఫెక్స్ విషయంలో టీమ్ తీసుకున్న శ్రద్ధ, హారర్ కామెడీనే అయినప్పటికీ దర్శకుడు ఆదిత్య సర్పోత్డర్ చూపించిన క్రియేటివిటీ రెండూ బోర్ కొట్టించకుండా సాగాయి. దెయ్యాలను వదిలించే పాత్రలో మన కట్టప్ప సత్యరాజ్ కనిపించడం విశేషం. ఆద్యంతం టైం పాస్ అయ్యేలా చేయడంలో ముంజ్య ఓ మోస్తరుగా పాసవ్వడంతో నార్త్ ఆడియన్స్ బాగా ఆదరిస్తున్నారు. తెలుగు రాష్ట్రాల్లోనూ చెప్పుకోదగ్గ సంఖ్యని రెండో వారంలోనూ కొనసాగిస్తున్న ముంజ్య ఈ ఏడాది సక్సెస్ ఫుల్ మూవీస్ లో ఒకటిగా నిలిచింది. కొత్త రిలీజ్ చందూ ఛాంపియన్ ని తట్టుకుని మరీ కంటిన్యూ అవుతోంది.