అల్లు వారి సినిమాకు వర్మ ప్రమోషన్

మెగా ఫ్యామిలీతో రామ్ గోపాల్ వర్మకు ఎక్కడ శత్రుత్వం మొదలైందో ఏమో కానీ.. వాళ్ల పొడే గిట్టనట్లు ట్విట్టర్ ద్వారా, తన సినిమాల ద్వారా గిచ్చుతూనే ఉంటాడాయన. ఒక దశ దాటాక ఈ విషయంలో మరీ శ్రుతి మించి పోయాడు వర్మ. పవన్ కళ్యాణ్‌ను శ్రీరెడ్డితో బూతులు తిట్టించే స్థాయికి దిగజారిపోయాడు. అంత వరకు సైలెంటుగా ఉన్న మెగా ఫ్యామిలీ సైతం ఆ సమయంలో తీవ్ర ఆగ్రహానికి లోనైంది.

వివాదాలకు దూరంగా ఉండే అల్లు అరవింద్ ప్రెస్ మీట్ పెట్టి.. వర్మను నికృష్టుడు అని తిట్టడం తెలిసిన సంగతే. అయినా సరే వర్మ మారలేదు. తాజాగా పవన్ కళ్యాణ్‌ను టార్గెట్ చేస్తూ ఓ సినిమా కూడా తీశాడు. ఆ వరుసలోనే అల్లు అరవింద్‌ను లక్ష్యంగా చేసుకుని ‘అల్లు’ అనే సినిమా తీయబోతున్నట్లు కూడా ప్రకటించాడు. ఆ సినిమా గురించి ప్రకటిస్తూ అరవింద్‌ను ఎలా టార్గెట్ చేశాడో కూడా తెలిసిందే.

ఇలాంటి సమయంలో అల్లు వారి ఓటీటీ ఫ్లాట్ ఫామ్ ‘ఆహా’లో రిలీజ్ కాబోతున్న ఒక సినిమా గురించి వర్మ ప్రమోషనల్ ట్వీట్ వేయడం అందరినీ ఆశ్చర్యపరుస్తోంది. ఆ సినిమా పేరు.. అమరం అఖిలం ప్రేమ. దీని ట్రైలర్‌ను వర్మ ట్విట్టర్ షేర్ చేసి చాలా బాగుందని కాంప్లిమెంట్ ఇచ్చాడు. నేరుగా ఆహాలోనే ఎక్స్‌క్లూజివ్‌గా ఈ నెల 18న విడుదల కాబోతోందీ చిత్రం. కొత్త హీరో హీరోయిన్లు విజయ్ రామ్, శివశక్తి సచ్‌దేవ్ జంటగా నటించిన ఈ సినిమాను కొత్త దర్శకుడు జొనాథన్ రూపొందించాడు.

స్కూల్లో ఓ అబ్బాయి లవ్ లెటర్ ఇస్తే నాన్నకు చూపించాక రెస్పాన్స్ చెబుతా అనే ఓ అమ్మాయి.. అల్లరి చిల్లరిగా తిరిగే ఓ అబ్బాయి మధ్య నడిచే ప్రేమకథ ఇది. ట్రైలర్ చూస్తే సినిమా ట్రెండీగా, యూత్‌ఫుల్‌గానే కనిపిస్తోంది. హీరోయిన్ తండ్రిగా కీలక పాత్ర చేసిన శ్రీకాంత్ అయ్యంగార్ వర్మకు క్లోజ్. ఆయన సినిమాల్లో కీలక పాత్రలు చేశాడు. అతడి కోసమే వర్మ ఈ ట్రైలర్‌ను షేర్ చేసి ప్రమోట్ చేసినట్లున్నాడు. ఈ మధ్యే హఠాత్తుగా గుండెపోటుగా ప్రాణాలు కోల్పోయిన సుకుమార్ మిత్రుడు ప్రసాద్.. ఈ చిత్రంతో నిర్మాతగా పరిచయం కావాల్సింది. కానీ సినిమా విడుదలయ్యే లోపు హఠాత్తుగా కన్నుమూశాడు.