సూపర్ హిట్ కొట్టి సైలెంటుగా పెళ్లి చేసుకుంటోంది

గత ఏడాది తమిళంలో మంచి విజయం సాధించిన చిన్న సినిమాల్లో ‘గుడ్ నైట్’ ఒకటి. తమిళంలో థియేటర్లలో రిలీజై సూపర్ హిట్టయ్యాక ఓటీటీలోకి వచ్చి తెలుగు ప్రేక్షకులను కూడా మెప్పించింది ఈ చిత్రం. ‘జై భీమ్’ లాంటి చిత్రాలతో మంచి గుర్తింపు సంపాదించిన మణికందన్ ఇందులో హీరో. అతడి సరసన మీతా రఘునాథ్ అనే కొత్తమ్మాయి కథానాయికగా నటించింది. ఆ సినిమాలో ఆమెనే ప్రధాన ఆకర్షణ. చాలా సున్నితంగా కనిపించే అనాథ అమ్మాయి పాత్రలో మీతా పెర్ఫామెన్స్ గురించి ఎంత చెప్పినా తక్కువే.

తెర మీద మనం చూస్తోంది ఒక నటిని అనే ఫీలింగే రానివ్వకుండా.. నిజంగా అలాంటి ఓ అమ్మాయిని చూస్తున్న భావన కలిగి తన పట్ల ఒక సానుభూతి కలిగేలా నటించింది మీతా. రెగ్యులర్ హీరోయిన్లకు చాలా భిన్నంగా కనిపించిన మీతా తర్వాత ఎలాంటి పాత్రల్లో నటిస్తుందా అన్న ఆసక్తి అందరిలోనూ కలిగింది.

ఒక్క సినిమాతో ఎంతో పాపులారిటీ సంపాదించిన ఈ అమ్మాయి ఇప్పుడు సడెన్‌గా పెళ్లి వార్తతో అందరికీ షాకిచ్చింది. తన సొంత ఊరు ఊటీలో ఆమె ఒక అబ్బాయితో ఎంగేజ్మెంట్ చేసుకుంది. తన పేరు, ఇతర వివరాలేవీ వెల్లడించలేదు. ఎంగేజ్మెంట్ పిక్స్ మాత్రం పెట్టి.. నా హృదయం అంటూ తనకు కాబోయే వాడి గురించి కామెంట్ పెట్టింది. ‘గుడ్ నైట్’తో వచ్చిన గుర్తింపుతో మీతాకు అవకాశాలు బాగానే వస్తాయని భావించారు.

ఎంతోమంది కుర్రాళ్లు ఇలాంటి అమ్మాయి తమ భార్యగా రావాలనుకున్నారు. కానీ వారి కలల విహారానికి బ్రేకులు వేస్తూ మీతా ఎంగేజ్మెంట్ గురించి ప్రకటించి షాకిచ్చింది. మీతా ఆల్రెడీ రిలేషన్‌షిప్‌లో ఉందని.. ముందు పెళ్లి చేసుకుని ‘గుడ్ నైట్’ తరహా ట్రెడిషనల్ రోల్స్‌కే పరిమితం కావాలన్న ఆలోచనతో ఉందని సన్నిహిత వర్గాలు చెబుతున్నాయి.