సలార్-2పై క్రేజీ అప్‌డేట్

ఇప్పుడు ఇండియన్ ఫిలిం ఇండస్ట్రీ అంతటా సీక్వెల్స్, పార్ట్-2ల హవా నడుస్తోంది. భారీ చిత్రాలు చాలా వాటికి సీక్వెల్స్ ప్రకటించేస్తున్నారు. ఇక హిట్టయిన సినిమాలకైతే ఈ ఒరవడి ఇంకా పెరుగుతోంది. బాహుబలి, కేజీఎఫ్, పుష్ప, దేవర.. ఈ జాబితా చాలా పెద్దదే.

ప్రభాస్ కొత్త చిత్రం ‘సలార్’ను కూడా రెండు భాగాలుగా తీయడానికి ఎప్పుడో ప్రణాళికలు రచించాడు దర్శకుడు ప్రశాంత్ నీల్. పార్ట్-1 గత డిసెంబరులో రిలీజై బాక్సాఫీస్ దగ్గర ఘనవిజయాన్ని అందుకుంది. అప్పుడే పార్ట్-2ను ‘సలార్: శౌర్యాంగపర్వం’ పేరుతో అనౌన్స్ చేశారు. ఐతే ఈ సినిమా ఎప్పుడు సెట్స్ మీదికి వెళ్తుంది, ఎప్పుడు రిలీజవుతుంది అనే విషయాల్లో రకరకాల ఊహాగానాలు నడిచాయి. ముందు వెంటనే సినిమాను మొదలుపెడతారని వార్తలు రాగా.. తర్వాతేమో ఇప్పుడిప్పుడే ఆ మూవీ ఉండదని ప్రచారం జరిగింది.

ఐతే ‘సలార్’లో వరదరాజ మన్నార్‌గా కీలక పాత్ర పోషించిన మలయాళ స్టార్ పృథ్వీరాజ్ సుకుమారన్.. ‘సలార్-2’ షూట్, రిలీజ్ గురించి కీలక అప్‌డేట్ ఇచ్చారు. ‘సలార్-2’కు స్క్రిప్టు ఆల్రెడీ లాక్ అయిందని.. వచ్చే నెలలోనే షూటింగ్ ఉండొచ్చని అతను వెల్లడించాడు. అంతే కాక ‘శౌర్యాంగపర్వం’ వచ్చే ఏఢాదే విడుదలవుతుందని కూడా ప్రకటించాడు. తన కొత్త చిత్రం ‘ఆడు జీవితం’ ట్రైలర్ లాంచ్ సందర్భంగా విలేకరులు ‘సలార్-2’ గురించి అడిగిన ప్రశ్నకు సమాధానంగా ఈ విషయం వెల్లడించాడు పృథ్వీరాజ్.

ప్రస్తుతం ప్రభాస్ ‘కల్కి’, ‘రాజా సాబ్’ చిత్రాల షూటింగ్‌తో తీరిక లేకుండా ఉన్నాడు. మరోవైపు సందీప్ రెడ్డి వంగ ‘స్పిరిట్’ను పట్టాలెక్కించే పనిలో ఉన్నాడు. ఇంత బిజీలో ప్రభాస్ ‘సలార్-2’కు ఎలా డేట్లు కేటాయించి వచ్చే ఏడాది సినిమా రిలీజయ్యేలా చూస్తాడో మరి.