మూడు జానర్ల మధ్య ముచ్చటైన పోటీ

ఇవాళ శివరాత్రి పండగ సందర్భంగా మూడు సినిమాలు ప్రేక్షకుల ముందుకు వస్తున్నాయి. ఒకదానికి మరొకటి సంబంధం లేని జానర్లు కావడంతో సర్వత్రా ఆసక్తి నెలకొంది. విశ్వక్ సేన్ గామి మీద ఎంత అంచనాలు పెరిగాయో అడ్వాన్స్ బుకింగ్స్ స్పష్టం చేస్తున్నాయి. టాక్ కనక పాజిటివ్ వస్తే అద్భుతాలు చేయడం ఖాయమని ట్రేడ్ వర్గాలు ఎదురు చూస్తున్నాయి. స్పిరిచువల్ థ్రిల్లర్ జానర్ లో రూపొందిన గామి ఏళ్ళ తరబడి నిర్మాణం జరుపుకుంది. ఇన్ని సంవత్సరాలు పడిన కష్టానికి తగిన గుర్తింపు ఖచ్చితంగా వస్తుందనే నమ్మకం దర్శకుడు విద్యాధర్, హీరో విశ్వక్ లలో కనిపిస్తోంది.

మాస్ లో పట్టుండి వరస ఫ్లాపులతో మార్కెట్ తగ్గించుకున్న గోపిచంద్ కు భీమా బ్లాక్ బస్టర్ కావడం చాలా కీలకం. దేనికీ చెప్పనంత ప్రత్యేకంగా ఈ సినిమా గురించి ప్రోమోట్ చేసుకోవడం చూస్తే శాండల్ వుడ్ నుంచి వచ్చిన దర్శకుడు హర్ష మీద పెట్టుకున్న నమ్మకం బలంగా కనిపిస్తోంది. ఫాంటసీ టచ్ తో కమర్షియల్ ఎలిమెంట్స్ మిస్ చేయకుండా అన్ని వర్గాలను టార్గెట్ చేసిన వైనం ట్రైలర్ లో కనిపించింది. ఇది హిట్ అయితే తర్వాత శ్రీను వైట్ల డైరెక్షన్ లో చేస్తున్న సినిమాకు బిజినెస్ పరంగా హెల్ప్ అవుతుంది. గుంటూరు కారం తర్వాత సరైన మాస్ సినిమా లేని లోటు కూడా తీరాలి.

వీటితో సమానంగా కాకపోయినా మలయాళం హిట్ ప్రేమలుని తెలుగులో తీసుకొచ్చిన ఎస్ఎస్ కార్తికేయ చక్కని ప్లానింగ్ తో ప్రీమియర్లతో పాటు రిలీజ్ ప్లాన్ చేసుకోవడంతో యూత్ లో దీని మీద క్రేజ్ ఉంది. హిట్ అయినా ఫ్లాప్ అయినా వాళ్ళ చేతుల్లోనే ఉంది. బడ్జెట్ పరంగా రిస్క్ లేని వ్యవహారం కావడంతో గామి, భీమాల తరహాలో బ్రేక్ ఈవెన్ టెన్షన్ అంతగా ఉండదు. ఇవి కాకుండా రికార్డు బ్రేక్, బులెట్, బాబు, రాజుగారి అబ్బాయి నాయుడు గారమ్మాయి అనే చిన్న సినిమాలు ఇంకొన్ని వస్తున్నాయి కానీ వాటికి మినిమమ్ బజ్ కూడా లేదు. చూడాలి మరి శివరాత్రి విజేతగా ఎవరు నిలవబోతున్నారో.