సౌత్ నిర్మాతతో పడుకోమన్నారు-బాలీవుడ్ నటి

నటిగా కంటే దివంగత సుశాంత్ సింగ్ రాజ్‌పుత్ మాజీ ప్రేయసిగా అంకితా లోఖండె ఎక్కువగా పాపులర్ అయింది. మీడియాలో తన పేరు ఈ కోణంలోనే ఎక్కువగా నానింది. సుశాంత్ టీవీ నటుడిగా ఉన్నపుడు తన సహ నటి అయిన అంకితతో కొన్నేళ్లు ప్రేమలో ఉన్నాడు. ఐతే తర్వాత అతను సినిమాల్లోకి వచ్చి స్టార్ అయ్యాడు. ఈ లోపు వాళ్లిద్దరి బంధం బీటలు వారింది. సుశాంత్ నుంచి విడిపోయిన కొన్నేళ్లకు అంకిత.. విక్కీ జైన్ అనే మరో వ్యక్తిని పెళ్లాడిన సంగతి తెలిసిందే.

ఆ విషయం పక్కన పెడితే.. తాజాగా సౌత్ సినిమాల్లో కాస్టింగ్ కౌచ్ గురించి అంకిత చేసిన వ్యాఖ్యలు చర్చనీయాంశం అవుతున్నాయి. ఒక సౌత్ మూవీలో అవకాశం వచ్చిందని తాను అప్పట్లో చాలా సంతోషించానని.. కానీ నిర్మాతతో పడుకుంటేనే ఆ ఛాన్స్ అని చెప్పడంతో షాకయ్యానని గుర్తు చేసుకుంది అంకిత.

“చాలా ఏళ్ల కిందట నేను ఒక దక్షిణాది చిత్రం ఆడిషన్స్‌కు హాజరయ్యాను. ఆ తర్వాత నాకు ఆ టీం నుంచి కాల్ వచ్చింది. ఆ సినిమాకు నన్ను ఓకే చేయడంతో మా అమ్మతో ఆ ఆనందాన్ని పంచుకున్నాను. కానీ నన్ను అంత సింపుల్‌గా సినిమాకు ఎంపిక చేయడం కొంత ఆశ్చర్యం కలిగించింది. కాంట్రాక్టు మీద సంతకం చేసేందుకు నన్ను పిలిచారు. అప్పుడు నాతో పాటు వచ్చిన మేనేజర్‌ను బయటే ఉండమని చెప్పి నన్ను లోపలికి రమ్మన్నారు. లోపలికి వెళ్లాక నేను కొంచెం కాంప్రమైజ్ కావాల్సి ఉంటుందని చెప్పారు. ఎలాంటి కాంప్రమైజ్ అని అడిగితే.. నిర్మాతతో ఒక రాత్రి గడిపితేనే నాకు ఆ అవకాశం దక్కుతుందని చెప్పారు. అప్పుడు అర్థమైంది.. ఆ నిర్మాతకు నా టాలెంట్‌తో సంబంధం లేదని. నాతో ఇలాంటివి కుదరవని చెప్పేసి అక్కడి నుంచి వచ్చేశాను” అని అంకిత వెల్లడించింది.