నన్నా దర్శకుడు కొట్టలేదు

సినిమాల చిత్రీకరణలో దర్శకులు, నిర్మాతలు అసహనానికి గురై ఆర్టిస్టుల మీద అరవడం.. కొన్నిసార్లు చేయి కూడా చేసుకోవడం గురించి గతంలో చాలా కథలు వినేవాళ్లం. కానీ తర్వాత రోజులు మారాయి. ఆర్టిస్టుల మీద అరిచినా అదో పెద్ద న్యూస్ అయిపోతోంది. మీడియాలో నానా రభస జరిగిపోతోంది. అందుకే ఇలాంటి వార్తలు గత కొన్నేళ్లలో బాగా తగ్గిపోయాయి. మంచి పెర్ఫామెన్స్ రాబట్టుకునే క్రమంలో తేడా వస్తే ఆర్టిస్టులను కొట్టేస్తాడని పేరున్న తేజ సైతం అలాంటి వాటికి దూరంగా ఉంటున్నట్లే కనిపిస్తున్నాడు.

ఇలాంటి టైంలో తమిళ సీనియర్ దర్శకుడు బాల.. ఓ హీరోయిన్ని కొట్టినట్లు ఈ మధ్య జోరుగా వార్తలు వచ్చాయి. అరుణ్ విజయ్ హీరోగా బాల తెరకెక్కిస్తున్న ‘వంగమన్’ సినిమాకు ముందు మలయాళ అమ్మాయి మామిత బైజు హీరోయిన్‌గా ఎంపికైంది.

కానీ ఆమె మధ్యలో ఆ సినిమా నుంచి తప్పుకుంది. ఇందుక్కారణం బాల ఆమెపై చేయిచేసుకోవడమే అని ఆ మధ్య మీడియాలో జోరుగా ప్రచారం జరిగింది. ఐతే ఈ వార్తలను ఇప్పుడు మామిత ఖండించింది. బ్లాక్‌బస్టర్ మూవీ ‘ప్రేమలు’తో మంచి పాపులారిటీ సంపాదించిన మామితను తాజాగా ఓ మీడియా సంస్థ బాలతో గొడవ గురించి అడిగింది.

దీనికామె బదులిస్తూ.. ‘‘మీడియాలో నా గురించి వస్తను్న వార్తలు నిజం కాదు. దర్శకుడు బాల గురించి నేనెప్పుడూ తప్పుగా మాట్లాడలేదు. వనంగాన్ సినిమా కోసం నేను దాదాపు ఏడాది పాటు పని చేశాను. ప్రి ప్రొడక్షన్ పనుల్లో భాగమయ్యాను. కానీ ఆ సినిమా ఆలస్యం అవుతుండటంతో వేరే కమిట్మెంట్ల వల్ల దూరం కావాల్సి వచ్చింది. అంతకుమించి ఏమీ జరగలేదు. బాల గారు సున్నితమైన మనస్తత్వం ఉన్న వ్యక్తి. ఆయన వల్ల నేను ఏ రకంగానూ ఇబ్బంది పడలేదు. ఆయన నన్ను కొట్టారన్నది అవాస్తవం’’ అని మామిత స్పష్టం చేసింది.