రజినీ కెరీర్లో ఇదొక మరక

సూపర్ స్టార్ రజినీకాంత్ సినిమా రిలీజవుతుంటే.. బాక్సాఫీస్ దగ్గర, సోషల్ మీడియాలో ఉండే హంగామానే వేరు. ఆయన ఎలాంటి సినిమా చేసినా.. ఎలాంటి దర్శకుడితో జట్టు కట్టినా.. జనాలు సినిమా చూడ్డానికి ఎగబడతారు. ప్రి రిలీజ్ హైప్ ఒక రేంజిలో ఉంటుంది. అడ్వాన్స్ బుకింగ్స్ జోరుగా జరుగుతాయి. కానీ ‘లాల్ సలాం’ అనే సినిమా విషయంలో మాత్రం దీనికి పూర్తి భిన్నంగా జరిగింది. ఈ పేరుతో ఓ సినిమా రిలీజవుతున్నట్లే జనాలకు పెద్దగా తెలియని పరిస్థితి.

తెలుగులోనే కాదు.. తమిళంలో కూడా ‘లాల్ సలాం’ ప్రేక్షకుల్లో ఆసక్తి రేకెత్తించలేకపోయింది. రజినీ చిన్న క్యామియో రోల్ ఏమీ చేయలేదు ఇందులో. ముప్పావుగంట కనిపించే కీలకమైన పాత్రే. అయినా ప్రేక్షకులు ఈ పాత్రతో, సినిమాతో కనెక్ట్ కాలేదు. రజినీ అంటే ప్రేక్షకులు ఫైర్ వర్క్స్ ఆశిస్తారు. కానీ రజినీ కూతురు ఆయన్ని ఒక ఉదాత్తమైన పాత్రలో చూపించి సందేశాలు ఇప్పించే ప్రయత్నం చేసింది. అది ప్రేక్షకులకు ఎంతమాత్రం రుచించలేదు. పోనీ సినిమా అయినా ఒక తీరుగా నడిచిందా అంటే అదీ లేదు. అనేక అంశాలను చూపించే క్రమంలో కన్ఫ్యూజ్ అయిపోయింది.

‘లాల్ సలాం’కు ప్రి రిలీజ్ బజ్ లేకపోవడం వల్ల ఓపెనింగ్స్ కూడా సరిగా లేవు. తెలుగులో అయితే సినిమా పూర్తిగా వాషౌట్ అయిపోయింది. తమిళంలో కూడా వసూళ్లు మరీ కనీస స్థాయిలో వచ్చాయి. రజినీ సినిమాకు మామూలుగా తొలి రోజు వచ్చే ఓపెనింగ్స్ స్థాయిలో కూడా ఫుల్ రన్ కలెక్షన్లు లేకపోవడం షాకిచ్చే విషయం. కేవలం రూ.30 కోట్ల లోపు వసూళ్లతో ఈ సినిమా రన్ పూర్తయింది. తెలుగులో రిలీజ్ ఖర్చులు కూడా వెనక్కి రాని పరిస్థితి. మొత్తంగా తన కూతురు ఐశ్వర్య దర్శకత్వంలో చేసిన సినిమా రజినీకి కెరీర్లోనే అతి పెద్ద మరకగా మిగిలిపోయింది.