థియేటర్లలో మాయమైన మసాలా పాట

తాజాగా విడుదలైన ఫైటర్ లో ఇష్క్ జైసా కుచ్ పాట లేకపోవడం మాస్ ప్రేక్షకులను షాక్ కి గురి చేసింది. సెన్సార్ సమయంలోనే దీన్ని తీసేయమని సూచించడంతో ఆ మేరకు దర్శక నిర్మాతలు ఆ సాంగ్ లేకుండానే రిలీజ్ చేశారు. నిజానికీ పాటలో హీరోయిన్ దీపికా పదుకునే విచ్చలవిడిగా అందాలు ఆరబోసింది. దీపిక పోషించిన పాత్ర ఎయిర్ ఫోర్స్ లో గౌరవనీయమైన గొప్ప పదవిలో ఉంటూ ఇలా అసభ్యంగా నృత్యాలు చేస్తున్నట్టు చూపించడం ఎంత మాత్రం సబబు కాదని అధికారులు అభ్యంతరం వ్యక్తం చేయడంతో ఫైనల్ గా తీసేయడం తప్ప వేరే ఆప్షన్ లేకపోయింది.

యూట్యూబ్ లో మాత్రం నిక్షేపంగా చూసుకోవచ్చు. ఇప్పటికే 53 మిలియన్ల వ్యూస్ తో ఎంత ట్రెండింగ్ లో ఉందో అర్థం చేసుకోవచ్చు. నిజానికి సినిమా చూశాక లేకపోవడమే సబబు అనిపించింది. ఎందుకంటే ఫైటర్ మొదటి నుంచి చివరి దాకా చాలా సీరియస్ గా సాగే యాక్షన్ డ్రామా. మైనస్సులు ఎన్ని ఉన్నప్పటికీ దర్శకుడు సిద్దార్థ్ ఆనంద్ దేశభక్తిని, ఎయిర్ ఫోర్స్ పోరాటాలను చూపించిన తీరు ప్రశంసలు అందుకుంది. రివ్యూలు, టాక్స్ మిక్స్డ్ గానే ఉన్నాయి కానీ గత ఏడాది ఇదే టైంలో పఠాన్ రూపంలో బ్లాక్ బస్టర్ అందుకున్న సిద్దార్థ ఆనంద్ కి ఫలితం రిపీట్ కాకపోవచ్చు.

అయినా ఏదో స్కిన్ షోతో హైప్ తెద్దామని అవసరం లేకపోయినా ఇలా అంగాంగ ప్రదర్శన చేసే పాటను ఉంచడం సిద్దార్థ్ ఆనంద్ కి మొదటిసారి కాదు. పఠాన్ టైంలోనూ ఇదే దీపికా పదుకునే దుస్తుల మీద వివాదం చెలరేగింది. అయితే షారుఖ్ ఖాన్ చొరవతో హైలైట్ కాలేదు. కానీ ఇప్పుడు మాత్రం తప్పించుకోలేకపోయాడు.