ఇది ఇంకో బలగం అవుతుందా?

బలగం అనే సినిమాను అనౌన్స్ చేసినపుడు దాన్ని ప్రేక్షకులు పెద్దగా పట్టించుకోలేదు. జబర్దస్త్ కామెడీ షోలో స్కిట్లు చేసిన కమెడియన్ వేణు దర్శకుడు అంటే ఆ సినిమాను మరింత లైట్ తీసుకున్నారు. కానీ ఆ సినిమా చూసి కదిలిపోయిన ప్రేక్షకులు వేణు దర్శకత్వ ప్రతిభకు ఫిదా అయిపోయారు.

ఇతడిలో ఇంత డెప్త్ ఉందా అని ఆశ్చర్యపోయారు. వేణు స్ఫూర్తితో ఇప్పుడు మరో కమెడియన్ దర్శకుడిగా మారుతున్నాడు. అతనే.. ధనరాజ్. వేణుతో పాటే అతను కూడా జబర్దస్త్‌‌లో కామెడీ స్కిట్లు చేశాడు. సినిమాల్లోనూ కామెడీ వేషాలు వేశాడు. కొన్ని నెలల కిందటే దర్శకుడిగా అతడి తొలి సినిమా అనౌన్స్ అయింది. తమిళ సీనియర్ నటుడు, దర్శకుడు సముద్రఖని ఈ చిత్రంలో కీలక పాత్ర పోషిస్తున్నాడన్న సమాచారం సినిమాపై ఆసక్తిని పెంచింది.

ఇక ఈ రోజే ఈ సినిమా టైటిల్, ఫస్ట్ లుక్ లాంచ్ చేశారు. రామం రాఘవం అనే ఆసక్తికర టైటిల్ పెట్టి ఒక స్ట్రైకింగ్ పోస్టర్ వదిలింది చిత్ర బృందం. ఫస్ట్ లుక్‌లో సముద్రఖని, ధనరాజ్‌ల క్లోజప్ లుక్స్ ఇంటెన్స్‌‌గా అనిపిస్తున్నాయి. పోస్టర్లో బ్లాక్ అండ్ వైట్ థీమ్ కూడా ఆకట్టుకుంది. సినిమాలో ప్రధాన పాత్రలు పోషిస్తున్న ఇద్దరు పాత్రధారుల పేర్లతోనే టైటిల్ పెట్టినట్లున్నారు. మొత్తంగా ఫస్ట్ ఇంప్రెషన్లో ధనరాజ్ మంచి మార్కులే కొట్టేశాడు.

ఒకేసారి తెలుగుతో పాటు తమిళ పోస్టర్ కూడా రిలీజ్ చేయగా.. కోలీవుడ్ క్రిటిక్స్ నుంచి మంచి స్పందనే కనిపిస్తోంది. పోస్టర్లో ఉన్న ఆసక్తి సినిమాలోనూ ఉంటే.. రామం రాఘవం మరో బలగం అయ్యే ఛాన్సుంది. పృథ్వీ పోలవరపు అనే కొత్త నిర్మాత స్లేట్ పెన్సిల్ స్టోరీస్ బేనర్ మీద ఈ చిత్రాన్ని ప్రొడ్యూస్ చేస్తున్నాడు.