ఫిబ్రవరి 9.. ఆ అమ్మాయికి ఎంతో కీలకం

కావ్య థాపర్.. దక్షిణాది సినిమాల్లో అదృష్టాన్ని పరీక్షించుకుంటున్న మరో ముంబై భామ. మోడలింగ్ బ్యాగ్రౌండ్ నుంచి వచ్చిన ఆమె.. రాహుల్ విజయ్ హీరోగా నటించిన ఈ మాయ పేరేమిటో అనే చిన్న సినిమాతో తెలుగులో కథనాయకగా పరిచయమైంది. ఇలాంటి ఓ సినిమా వచ్చినట్లు కూడా జనాలకు పెద్దగా తెలియదు.

ఆ తర్వాత సంతోష్ శోభన్ సరసన చేసిన ఏక్ మినీ కథ కావ్యకు ఒక మాదిరి గుర్తింపు తెచ్చిపెట్టింది. కాకపోతే ఆ సినిమాకు థియేటర్ రిలీజ్ లేదు. నేరుగా ఓటిటిలోనే రిలీజ్ అయింది. కాబట్టి నిఖార్సైన హిట్ కొట్టినట్లు కాదు. మధ్యలో తమిళంలో రెండు మూడు సినిమాలు చేసిన కావ్యకు అక్కడా సరైన విజయం దక్కలేదు.

అయితే కావ్య ట్రాక్ రికార్డు పట్టించుకోకుండా ఆమెకు రెండు పేరున్న సినిమాల్లో అవకాశాలు ఇచ్చారు. అవే ఈగల్, ఊరి పేరు భైరవకోన. విశేషం ఏమిటంటే ఈ రెండు చిత్రాలు ఒకే రోజు రిలీజ్ కాబోతున్నాయి. సంక్రాంతికే రిలీజ్ కావలసిన ఈగల్ చివరి నిమిషంలో ఫిబ్రవరి 9కి వాయిదా పడిన సంగతి తెలిసిందే.

అదే తేదీకి ఆల్రెడీ ఊరి పేరు భైరవకోన షెడ్యూల్ అయి ఉంది. ఈ రెండు చిత్రాలు ప్రస్తుతానికైతే ఒకే డేట్ కి వచ్చేలా కనిపిస్తున్నాయి. ఇలా రెండు క్రేజ్ ఉన్న సినిమాల్లో ఒకే హీరోయిన్ నటించడం, అవి రెండూ ఒకే రోజు రిలీజ్ కావడం అరుదైన విషయమే. ఈ రెండు చిత్రాల్లోనూ కావ్య పర్ఫామెన్స్ ఓరియంటెడ్ రోల్స్ చేసినట్లు కనిపిస్తోంది.

గత ఏడాది సంక్రాంతికి ఒక రోజు వ్యవధిలో శృతిహాసన్ చిత్రాలు వాల్తేరు వీరయ్య, వీరసింహరెడ్డి రిలీజ్ అయ్యాయి. రెండు పెద్ద హిట్ అయ్యాయి. ఇప్పుడు అదే కోవలో కావ్య నటించిన రెండు సినిమాలు.. సక్సెస్ అయి ఆమె కెరీర్ కు ఊపు తెస్తాయేమో చూడాలి.