హనుమాన్.. ఇది కదా సక్సెస్ అంటే

హనుమాన్ సినిమా రిలీజ్ టైంలో థియేటర్ల కేటాయింపు పరంగా ఎన్ని ఇబ్బందులు ఎదురయ్యాయో తెలిసిందే. హైదరాబాద్ లాంటి పెద్ద సిటీలో కేవలం నాలుగు అంటే నాలుగు డొక్కు థియేటర్లు ఇచ్చారు ఆ చిత్రానికి. మల్టీప్లెక్సుల్లో కూడా చాలినన్ని షోలు పడలేదు. కొన్నిచోట్ల ఆల్రెడీ హనుమాన్ కు అగ్రిమెంట్ అయిన సింగిల్ థియేటర్లను కూడా తీసి వేరే చిత్రానికి ఇచ్చేశారు.

ఈ ఇబ్బందులన్నీ చాలవన్నట్లు ఏషియన్ మూవీస్ సంస్థ.. థియేటర్ల విషయంలో గొడవ చేస్తున్నందుకు హనుమాన్ టీంను తప్పుబడుతూ తమ స్క్రీన్ల నుంచి హనుమాన్ షోలను తీసేసింది. రిలీజ్ కి ముందు రోజు ఏఎంబి సహా ఆ సంస్థ స్క్రీన్లలో పెయిడ్ ప్రీమియర్లు పడలేదు.

తర్వాత వ్యవహారం సద్దుమణిగి అన్నిచోట్ల హనుమాన్ రన్ అయింది. అయితే విడుదల తర్వాత హనుమాన్ ఎలాంటి ప్రభంజనం సృష్టిస్తోందో తెలిసిందే. అంతకుముందు హనుమాన్ ను దూరం పెట్టిన చాలా థియేటర్లలో ఈ సినిమానే ఆడుతూ వసూళ్ల పంట పండిస్తోంది.

ఇంకో విశేషం ఏంటంటే రిలీజ్ ముంగిట హనుమాన్ సినిమాను పక్కన పెట్టిన ఏషియన్ సంస్థ.. ఇప్పుడు కొత్తగా హైదరాబాద్ శివారులోని పటాన్ చెరులో ఒక పెద్ద మల్టీప్లెక్స్ ను హనుమాన్ మూవీతోనే మొదలుపెట్టింది. ప్రారంభోత్సవ కార్యక్రమానికి హనుమాన్ హీరో తేజ ముఖ్యఅతిథిగా హాజరు కావడం విశేషం.

ముందు తమ చిత్రాన్ని కాదనుకున్న సంస్థ..ఇప్పుడు అదే సినిమాతో పెద్ద మల్టీప్లెక్స్ ఓపెన్ చేయడం.. అందులో ఆ సినిమా హీరో పాల్గొనడం చూసి ఇది కదా సక్సెస్ అంటే అని నెటిజెన్లు అభిప్రాయపడుతున్నారు