సర్కారు నౌకరి ఎలా ఉంది

ప్రముఖ గాయని సునీత అబ్బాయి ఆకాష్ గోపరాజు హీరోగా పరిచయమైన సినిమా సర్కారు నౌకరి. దీని ప్రత్యేకత కె రాఘవేంద్రరావు నిర్మాత కావడం. పబ్లిసిటీ పెద్దగా చేయలేదు కానీ ట్రైలర్ ని చిరంజీవితో లాంచ్ చేయించడం, సోషల్ మీడియాలో కాసింత హడావిడి చేయడంతో కూసింత ఆసక్తి కలిగింది. నూతన సంవత్సరంలో టాలీవుడ్ నుంచి వచ్చిన తొలి స్ట్రెయిట్ రిలీజ్ ఇదే. రెండు రోజుల క్రితం యాంకర్ సుమ వారసుడు రోషన్ కనకాల బబుల్ గమ్ అంచనాలు అందుకోలేకపోయిన నేపథ్యంలో మరి ఆకాష్ ఏమైనా భిన్నమైన ఫలితం అందుకున్నాడో లేదో  రిపోర్ట్ చూస్తే అర్థమైపోతుంది.

ఉమ్మడిరాష్టంగా ఉన్నప్పుడు 1996 ప్రాంతం కొల్లాపూర్ లో జరిగిన సంఘటనల ఆధారంగా ఈ కథ రాసుకున్నారు. అనాథ అయిన గోపాల్ (ఆకాష్ గోపరాజు) కష్టపడి చదువుకుని హెల్త్ డిపార్ట్ మెంట్ లో ఉద్యోగం తెచ్చుకుంటాడు. సత్య(భావన)ని ప్రేమించి పెళ్లి చేసుకుంటాడు. ఎయిడ్స్ ఉదృతంగా ఉన్న తరుణంలో కండోమ్ లు పంచి గ్రామస్తుల్లో అవగాహన పెంచే డ్యూటీని ప్రభుత్వం గోపాల్ కు అప్పగిస్తుంది. ఈ క్రమంలో అవమానాలు ఎదురవుతాయి. భార్య పుట్టింటికి వెళ్తానన్నా చలించడు. మరి పనే దైవంగా భావించే గోపాల్ ఇదంతా తట్టుకుని తన కర్తవ్యాన్ని ఎలా నిర్వర్తించాడు అనేదే కథ.

జనాలు ఎప్పుడో మర్చిపోయి ఎయిడ్స్ ప్రమాదకారి కాదనే స్థితికి సమాజం చేరాక ఆ బ్యాక్ డ్రాప్ ని ఎంచుకోవడంలో దర్శకుడు గంగామోని శేఖర్ పెద్ద రిస్క్ చేశాడు. అయితే ఎంటర్ టైన్మెంట్, డ్రామా సమపాళ్ళలో ఉంటే ఇలాంటి కథలతో మెప్పించడం కష్టమేమి కాదు. కానీ సర్కారు నౌకరికి ఈ విషయంలో పెద్దగా హోమ్ వర్క్ జరగలేదు. అక్కడక్కడా కామెడీ ఉన్నప్పటికీ సెకండ్ హాఫ్ లో నాటకీయత మరీ ఎక్కువైపోవడంతో డాక్యుమెంటరీకి సినిమాకి మధ్య నలిగిపోయింది. ఎమోషన్ ని ఓవర్ ప్లే చేశారు. 90 వాతావరణాన్ని సహజంగా సృష్టించినా ఆ ఒక్క అంశం సినిమాను నిలబెట్టలేకపోయింది.