రాజమౌళి రికార్డులను టచ్ చేయగలరా

గుంటూరు కారంతో రాజమౌళి రికార్డుల దగ్గరికి వెళ్తామని నెలల క్రితం నిర్మాత నాగవంశీ అన్న మాటలు ఇప్పుడు ఫ్రెష్ గా వైరలవుతున్నాయి. నిజానికి ఆ ఇంటర్వ్యూ  టైంలో ఇంత పోటీ ఉంటుందని ఎవరికీ తెలియదు. ఇంకో రెండు సినిమాలు ఉంటాయని ఊహించారు కాని కాంపిటీషన్ చాలా టఫ్ గా మారుతుందనేది కలలో కూడా అనుకోని ట్విస్ట్. నిజంగా మహేష్ బాబుతో బాహుబలి లేదా ఆర్ఆర్ఆర్ సెట్ చేసిన బెంచ్ మార్కులను దాటడం సాధ్యమా అంటే, సోలో వచ్చి ఉంటే ఏమో కానీ ఇప్పుడు మాత్రం అసాధ్యమే అంటున్నాయి ఆరితేరిన ట్రేడ్ వర్గాలు.

అలా అనుకోవడంలో లాజిక్ ఉంది. ఎందుకంటే ప్రతి చిత్రానికి బలమైన బ్యాకప్, డిస్ట్రిబ్యూషన్ నెట్ వర్క్ ఉన్నాయి. ఆ ధీమాతోనే ఎవరూ వెనక్కు తగ్గమంటూ బాసింపట్టు వేసుకుని కూర్చున్నారు. సైంధవ్ కి సురేష్ బాబు స్వంత థియేటర్లతో పాటు ఎన్నో ప్రాజెక్టుల్లో భాగస్వామిగా ఉన్న ఏషియన్ ఫిలిమ్స్ తోడ్పాటు చాలా ఉంటుంది. హనుమాన్ కి మైత్రి అండదండలు పెద్ద ఎత్తున పని చేయబోతున్నాయి. నా సామిరంగకు అన్నపూర్ణ స్టూడియోస్ దన్నుతో పాటు గీత ఆర్ట్స్ సపోర్ట్ ఉంటుందని ఇన్ సైడ్ టాక్. ఈగల్ కోసం ఇద్దరు ప్రముఖ పంపిణీదారులు రంగంలోకి దిగుతారని తెలిసింది.

ఇక్కడ థియేటర్ల సర్దుబాటు తీవ్ర సమస్య. జనవరి 12 హనుమాన్ తో తలపడే గుంటూరు కారంకి మొదటి రోజు షోలు, కలెక్షన్ల పరంగా పెద్దగా ఇబ్బంది ఉండకపోవచ్చు కానీ 13 నుంచి స్క్రీన్ కౌంట్ విషయంలో ఎంతో రాజీ పడాల్సి ఉంటుంది. దాని వల్ల మేజిక్ ఫిగర్లు సాధ్యం కావు. ఉదాహరణకు మూడు థియేటర్లుండే చిన్న సెంటర్లో 15 షోలకు గాను మహేష్ కి మహా అయితే ఏడు షోలు దొరికితేనే గొప్పనుకోవాలి. ఇలా చూసుకుంటూ పోతే వందల కేంద్రాలు తేలుతాయి. సోలోగా వచ్చిన సలారే కెజిఎఫ్ ని టచ్ చేయలేకపోయింది. మరి గుంటూరు కారం ఏకంగా జక్కన్నని లక్ష్యంగా పెట్టుకుంది. ఏం చేస్తుందో చూడాలి.