హౌస్ ఫుల్, బ్లాక్ బస్టర్ అంతా ఉత్తిదేనా?

ఇది మార్కెటింగ్ యుగం. వస్తువైనా మనిషైనా జనాలకు త్వరగా చేరాలంటే పబ్లిసిటీ అవసరం. లేదంటే ఉనికిని చాటుకోవడం కష్టం. సినిమాలకు మరీ మరీ ముఖ్యం. ముఖ్యంగా చిన్న బడ్జెట్ తో తీసి అష్టకష్టాలు పడే నిర్మాతలకు ఇది తప్పనిసరి. సోషల్ మీడియా వచ్చాక ఇది సరికొత్త రూపాలు సంతరించుకుంది. మీమర్స్ పుట్టుకొచ్చారు. లక్షలాది ఫాలోవర్స్ ఉన్న హ్యాండిల్స్ ప్రభావం పెరిగిపోయింది. ఇన్ఫ్లు యెన్సర్ల పేరుతో మీడియాకు పోటీ ఇచ్చే స్థాయిలో కొందరు ప్రయత్నాలు చేస్తూనే ఉన్నారు. ఇదంతా ఒకవైపు.

ఈ ట్రెండ్ ఇప్పుడు ఆర్టిఫిషియల్ హైప్ (కృత్రిమ ప్రచారం) అనే గాలిబుడగని సృష్టించింది. దీని ట్రాప్ లో ప్రొడ్యూసర్లు పడుతున్నారు. అంటే లేని బజ్ తీసుకొచ్చి ప్రేక్షకుల మెదళ్లలో తమ సినిమాని ఎలాగైనా రిజిస్టర్ చేయాలన్న ఉద్దేశంతో పెయిడ్ ప్రమోషన్ల కోసం లక్షలు ఖర్చు పెట్టేందుకు వెనుకాడటం లేదు. ఏదో ఒక ఇష్యూని హైలైట్ చేయడం ద్వారా ఎక్స్, ఇన్స్ టా తదితర మాధ్యమాల్లో వైరల్ కావడం ఈ స్ట్రాటజీలోని ప్రధాన ఉద్దేశం. తద్వారా ఆడియన్స్ ని సులభంగా ఆకట్టుకుని థియేటర్లకు వచ్చేలా చేయొచ్చని నిర్మాతలు భావిస్తున్నారు.

దీని కోసం గివ్ అవే పేరుతో వందలాది టికెట్లు ఉచితంగా పంచేస్తారు. ఊరు, థియేటర్ పేరు చెబితే చాలు టికెట్లు వచ్చేస్తాయి. మల్టీప్లెక్సులు, బిసి సెంటర్లలో బజ్ లేని సినిమాలకు షోలు క్యాన్సిల్ కాకుండా కాపాడేది ఇవే. ఫ్రీగా ఇచ్చినవి కాబట్టి దాదాపుగా అన్నీ హౌస్ ఫుల్ అవుతాయి. ఈ వీడియోలను షూట్ చేసుకొచ్చి ఇంత బ్రహ్మాండంగా ఓపెనింగ్స్ వచ్చాయని ఆఫీస్ దగ్గర బాణాసంచా కాల్చేసి సూపర్ హిట్ అని పోస్టర్లు వదులుతారు. నిజమేంటో అందరికీ తెలిసిందే. కాకపోతే పైకి ఎవరికి వారు అంతా నిజమనేలా నటిస్తారు.

కానీ జనాలు అంత అమాయకులు కాదు. ఫైనల్ గా మాట్లాడాల్సింది కంటెంటే. అది తేడా కొట్టిందంటే ట్విట్టర్ లో ఎన్ని బాకాలు ఊదినా, పొగడ్తల వర్షం గుప్పించుకున్నా థియేటర్లలో పబ్లిక్ ఉండరు. వాటి ఓనర్ల మొహాల్లో నవ్వులూ ఉండవు. కల్ట్ ముద్ర వేసి కొన్ని ప్రేమకథలను గొప్పగా ప్రచారం చేస్తారు. కట్ చేస్తే ఫ్యామిలీస్ కాదు కదా కనీసం కాలేజీ యువత కూడా అంతంత మాత్రంగానే వస్తారు.

కేవలం తమ ఈగోలను సంతృప్తిపరుచుకోవడానికో లేదా తాము గొప్ప సినిమా తీశామనే నమ్మకాన్ని సమర్ధించుకోవడానికో కొంతమంది నిర్మాతలు పదే పదే ఈ ఆర్టిఫీషియల్ హైప్ ని నమ్ముకోవడం ఎంత మాత్రం క్షేమం కాదు. ఏ హంగామా చేయకపోయినా కంటెంట్ బాగుంటే గొప్పగా ఆడిన సూపర్ హిట్స్ చరిత్రలో ఎన్నో ఉన్నాయి. వాటిలో ముక్కుమొహం తెలియని హీరోలు నటించినవి, స్టార్ ఇమేజ్ తో మార్కెట్ ని శాశించే బడా నటులు చేసినవీ ఉన్నాయి. ఆర్గానిక్ ప్రమోషన్లతో ఎలాంటి ఇబ్బంది ఉండదు. ప్రేక్షకులు కూడా అంగీకరిస్తారు. అలా కాదని బలవంతంగా వాళ్ళ మెదళ్లలోకి ఏదో జొప్పించాలని చూస్తే రివర్స్ కావడం ఖాయం.

కోట్ల రూపాయల వసూళ్లు, బ్లాక్ బస్టర్ స్టాంపులు ఎన్ని వేసుకున్నా మొదటి రెండు మూడు రోజులు థియేటర్లకు వెళ్లిన జనాలకు సినిమాలో సత్తా ఎంత ఉందో తెలుస్తుంది. బాగుంటే అదే పబ్లిక్ టాక్ గా బయటికి వచ్చి వసూళ్ల వర్షం కురిపిస్తుంది. తేడా కొడితే అబ్బే ఏం లేదు, ఊరికే హంగామా చేస్తున్నారనే ప్రచారం తిరిగి అదే పబ్లిక్ నోటి ద్వారా అందరికీ చేరుతుంది. సో హైప్ తెచ్చుకోవడం తప్పు కాదు. కానీ క్రియేటివిటీ పేరుతో ఉత్తుత్తి హంగామాలు చేస్తూ పోతే మాత్రం భవిష్యత్తులో నిజమైన కంటెంట్ ని కూడా నమ్మకపోయే ప్రమాదముంది. నిర్మాతలు ఇది గుర్తించిన రోజు ఫేక్ ప్రాపగండాకు బ్రేకులు పడతాయి.