తృటిలో మిస్సయిన RRR రికార్డు

నిన్న విడుదలైన సలార్ ఓపెనింగ్స్ ఒక్కసారిగా బాక్సాఫీస్ కి ఎక్కడ లేని ఉత్సాహాన్ని తీసుకొచ్చాయి. భగవంత్ కేసరి తర్వాత చెప్పుకోదగిన బ్లాక్ బస్టర్ లేక థియేటర్లు అల్లాడిపోతున్న సమయంలో హౌస్ ఫుల్ బోర్డులతో, టికెట్ల కోసం రికమండేషన్ కాల్స్ తో డిస్ట్రిబ్యూటర్లు ఉక్కిరిబిక్కిరవుతున్నారు. ఇదే ఊపు ఎన్ని రోజులు ఉంటుందనేది ఇప్పుడే చెప్పలేం కానీ ప్రభాస్ స్టామినాకు బాలీవుడ్ పండితులు నివ్వెరబోతున్నారు. హిందీ బెల్ట్ లో డంకీ వల్ల ఆశించిన స్థాయిలో స్క్రీన్లు దక్కకపోయినా ఈ రేంజ్ లో ఫిగర్లు నమోదు కావడం చూసి రెబెల్ స్టార్ ని తక్కువంచనా వేయకూడదని అర్థం చేసుకున్నారు.

పలు ఏరియాల్లో ఆర్ఆర్ఆర్ రికార్డుని సలార్ తృటిలో మిస్ చేసుకుంది. ట్రేడ్ సమాచారం ప్రకారం ట్రిపులార్ నైజామ్ ఫస్ట్ డే రికార్డు 23 కోట్ల 35 లక్షలతో నమోదైంది. సలార్ కేవలం ఎనభై లక్షల వ్యత్యాసంతో 22 కోట్ల 55 లక్షల దగ్గర ఆగిపోవడం డార్లింగ్ ఫ్యాన్స్ ని నిరాశ పరిచింది. ఒకవేళ డంకీ లేకుండా సోలో రిలీజ్ దక్కి ఉంటే అదనపు థియేటర్లు దొరికి సులభంగా నైజామ్ నెంబర్ వన్ స్థానం దక్కేదనే కామెంట్లో అక్షరం అబద్దం లేదు. ఒక్క క్రాస్ రోడ్స్ లోనే డంకీకి మూడు, హాయ్ నాన్నకు ఒకటి, ఆక్వామెన్ కి రెండు థియేటర్లు కేటాయించడం బట్టే పరిస్థితిని అర్థం చేసుకోవచ్చు.

నిన్న వచ్చిన టాక్ తో వీకెండ్ మొత్తం సలార్ కంట్రోల్ లోనే ఉండబోతోంది. షోలు పెంచుతున్నారు. చాలా జిల్లా కేంద్రాల్లో డెబ్భై షోలకు పైగానే ప్లాన్ చేసుకోవడం క్రేజ్ కి నిదర్శనం. మొదటి వారంలోనే క్రిస్మస్ సెలవులు వస్తున్నాయి కాబట్టి కౌంట్ పెరగడం తప్ప తగ్గడం ఉండదు. ఇక్కడి సంగతి సరే ముంబైలోని ప్రసిద్ధ సింగల్ స్క్రీన్ మరాఠా మందిర్ లో పబ్లిక్ డిమాండ్ కి తలొగ్గి డంకీ షోలు తగ్గించి మరీ సలార్ కి మూడు ఆటలు అదనంగా వేయడం బట్టే చెప్పొచ్చు ఉత్తరాదిలోనూ దేవా వీరంగం మాములుగా లేదని. ఇప్పుడు దీని ఫోకస్ అంతా నాన్ రాజమౌళి రికార్డుల మీదే ఉంది.