హనుమాన్ బలం బలహీనత అదే

తేజ సజ్జ హీరోగా ప్రశాంత్ వర్మ దర్శకత్వంలో భారీ బడ్జెట్ తో రూపొందిన ప్యాన్ ఇండియా మూవీ హనుమాన్ సంక్రాంతి బరిలో నుంచి తప్పుకునే సమస్యే లేదని నిన్న జరిగిన కొత్త పాట విడుదల వేడుకలో మరోసారి స్పష్టంగా చెప్పేశారు. జనవరి రేసుని వదులుకోవడం ఉండదని నొక్కి వక్కాణించారు. ఫ్యామిలీ మొత్తానికి పండగ సినిమాకు కావాల్సిన అన్ని అంశాలు ఇందులో ఉన్నాయని, ఒక కొత్త ప్రపంచంలో విహరిస్తారని ప్రశాంత్ వర్మ గ్యారెంటీ ఇస్తున్నాడు. అయితే నిజ జీవితంలో హనుమంతుడికి తన బలం బలహీనత స్వంతంగా ఎలాగైతే తెలియదో ఇక్కడా అదే జరుగుతోంది.

జనవరి 12 గుంటూరు కారం వస్తోంది. అదే రోజు హనుమాన్ తలపడటం వల్ల మహేష్ బాబు బృందానికి వచ్చిన ఇబ్బందేమీ లేదు. ఎటొచ్చి థియేటర్ల సర్దుబాటు, షోల పంపకం గురించి తేజ సజ్జ టీమ్ టెన్షన్ పడాల్సి ఉంటుంది. ఎవరికి వారు డిస్ట్రిబ్యూటర్లు వేరుగా ఉండొచ్చు, ఒకటే కావొచ్చు. అది కాదు సమస్య. మాస్ హీరోల డామినేషన్ అధికంగా ఉండే బిసి సెంటర్లో స్క్రీన్లు తక్కువగా ఉంటాయి. వాటిని సమానంగా పంచడం కుదరదు. సహజంగానే గుంటూరు కారం డామినేషన్ ఉంటుంది. స్టార్ హీరో లేకపోవడం వల్ల హనుమాన్ ని మొదటి రోజే చూడాలన్న ఆత్రం సగటు జనాల్లో ఉండకపోవచ్చు.

కాస్త ప్రాక్టికల్ గా అలోచించి హనుమాన్ జనవరి 1 నుంచి 11 మధ్యలో లేదా 13 నుంచి 15 లోపు ప్లాన్ చేసుకుంటే ఓపెనింగ్స్ తో పాటు మంచి రన్ సొంతం చేసుకోవచ్చని బయ్యర్ల అభిప్రాయం. ఎందుకంటే గుంటూరు కారం వచ్చేనాటికి ఫోకస్ మొత్తం దాని మీదే ఉంటుంది కాబట్టి కేవలం విజువల్ ఎఫెక్ట్స్ ని చూపించి భారీ పబ్లిక్ ని హనుమాన్ కి రప్పించలేమని అంటున్నారు. కంటెంట్ అద్భుతంగా ఉండొచ్చు. దాన్ని వదలడానికి టైమింగ్ కూడా అంతే ముఖ్యం. అసలే బరిలో సైంధవ్, ఈగల్, నా సామి రంగా ఉన్నాయి. 12 నుంచి మారే ఛాన్సే లేదని హనుమాన్ అంటుంటే ఎవరైనా చేయగలిగింది ఏముంది.