బాలయ్య షోతో రణబీర్ ఫిదా

బాలీవుడ్ హీరోలు ఇప్పుడు సౌత్ ఇండియా ప్రమోషన్ల మీద ప్రత్యేక శ్రద్ధ పెడుతున్నారు. నార్త్ ఇండియాలో సౌత్ హీరోల సినిమాల హవా అంతకంతకూ పెరుగుతుండగా.. బాలీవుడ్ హీరోలు తమ చిత్రాలకు సౌత్‌లో రీచ్ పెంచడానికి గట్టిగా ప్రయత్నిస్తున్నారు. షారుఖ్ ఖాన్ ‘పఠాన్’, ‘జవాన్’ సినిమాలను దక్షిణాదిన బాగా ప్రమోట్ చేయడం ద్వారా మంచి వసూళ్లు తెచ్చుకోగలిగాడు. ఆల్రెడీ ‘బ్రహ్మాస్త్ర’తో దక్షిణాదిన మంచి ఫలితాన్నందుకున్న రణబీర్ కపూర్.. ఇప్పుడు ‘యానిమల్’తో ఇక్కడి ప్రేక్షకులను మరింతగా మెప్పించాలని చూస్తున్నాడు.

ఇప్పటికే ‘యానిమల్’ ప్రోమోలు సినిమాకు తెలుగు సహా దక్షిణాది భాషల్లో మంచి హైప్ తీసుకొచ్చాయి. దీనికి ప్రమోషన్ల హడావుడి కూడా తోడైతే ఓపెనింగ్స్ మరింత ఎక్కువ ఉంటాయని టీం భావిస్తోంది. ఈ క్రమంలోనే రణబీర్.. దర్శకుడు సందీప్ రెడ్డి వంగ, హీరోయిన్ రష్మికలతో కలిసి బాలయ్య షో ‘అన్‌స్టాపబుల్’కు వచ్చాడు.

ఈ షోను రణబీర్ భలే ఎంజాయ్ చేశాడని షో చూసిన వాళ్లెవ్వరికైనా అర్థమైపోతుంది. బాలయ్య అండ్ కో.. రణబీర్‌ను రిసీవ్ చేసుకున్న తీరు.. తన ఫ్యామిలీ లెగసీ గురించి షోలో ఇచ్చిన ప్రెజెంటేషన్.. అతడితో బాలయ్య సంభాషణ చూడముచ్చటగా అనిపించాయి. కపూర్ వంశీ ఘన చరిత్ర గురించి ఒక హృద్యమైన వీడియోతో రణబీర్‌ను కదిలించింది అన్‌స్టాపబుల్ టీం. ఇక బాలయ్య.. పృథ్వీరాజ్ కపూర్ సహా ఆ వంశపు హీరోల సినిమాల్లోని ఫేమస్ డైలాగులను పలుకుతూ రణబీర్‌ను టచ్ చేశాడు. ఇద్దరి మధ్య హిందీ సంభాషణ కూడా హుషారుగా సాగింది.

ఇక పెళ్లికి ముందు ఎవరితోనూ డేటింగ్ చేయలేదని రణబీర్ అన్నపుడు బాలయ్య ఇచ్చిన ఎక్స్‌ప్రెషన్.. ఆలియాతో అనుబంధం గురించి మాట్లాడిన మాటలు సరదాగా అనిపించాయి. రణబీర్ సైతం ‘ఫ్లూట్ జింక ముందు ఊదు.. సింహం ముందు కాదు..’’.. ‘‘డోంట్ ట్రబుల్ ద ట్రబుల్’.. లాంటి బాలయ్య డైలాగులను చెప్పి ఆయన అభిమానులను ఆకట్టుకున్నాడు. మొత్తంగా ఈ ఎపిసోడ్ సూపర్ హిట్ అనడంలో సందేహం లేదు.