పొలిమేర.. సంచలనం అంటే ఇదే

మా ఊరి పొలిమేర.. కరోనా టైంలో నేరుగా హాట్ స్టార్ ఓటీటీలో రిలీజైన సినిమా. ఆ చిత్రం మొదలుపెట్టి కాసేపు చూస్తే.. ఇదేం సినిమారా బాబూ అనిపిస్తుంది. చేతబడుల చుట్టూ కథను నడిపిస్తూ.. పాత్రలతో పచ్చి బూతులు మాట్లాడిస్తూ.. కొన్ని శృంగార సన్నివేశాలను హద్దులు దాటించి.. ఇదొక బి-గ్రేడ్ మూవీ అనే ఫీలింగ్ కలిగిస్తారు. కానీ మొత్తం సినిమా చూశాక అభిప్రాయం మారుతుంది.

ముఖ్యంగా సత్యం రాజేష్ పాత్ర చిత్రణ.. కథలోని మలుపులు.. ఒళ్లు గగుర్పొడిచే కొన్ని సీన్లు.. డిఫరెంట్ ఫీలింగ్ ఇస్తాయి. ఏ పబ్లిసిటీ లేకపోయినా మౌత్ టాక్‌తోనే ఈ సినిమా హాట్ స్టార్‌లో ఊహించని స్థాయిలో ఆదరణ దక్కించుకుంది. ఆ ఓటీటీలో హైయెస్ట్ వ్యూస్ తెచ్చుకున్న సినిమాల్లో ఒకటిగా నిలిచింది. అక్కడ వచ్చిన స్పందన చూసే.. ‘మా ఊరి పొలిమేర-2’ను కొంచెం పెద్ద బడ్జెట్లో థియేట్రికల్ రిలీజ్ లక్ష్యంగా తీసింది చిత్ర బృందం.

ఈసారి కథ విస్తృతి పెంచారు. క్వాలిటీ కూడా పెరిగింది. బూతులు, శృంగార సన్నివేశాలు లేకుండా థియేటర్లలో చూడదగ్గ ఫీచర్ ఫిలిం లాగా దీన్ని మలిచారు. బన్నీ వాసు ఈ ప్రాజెక్టులో భాగం కావడంతో దీనికి మంచి రిలీజ్ కూడా దక్కింది. రిలీజ్‌కు ముందు అందరి దృష్టీ ‘కీడా కోలా’ మీదే ఉండగా.. ఓ మోస్తరు హైప్‌తో రిలీజైన ఈ సినిమా.. విడుదల తర్వాత సంచలనం రేపుతోంది. తొలి రోజు సింగిల్ స్క్రీన్లో ఈ సినిమాకు కనిపించిన ఆక్యుపెన్సీలు చూసి షాకయ్యారు ఇండస్ట్రీ జనాలు. ‘కీడా కోలా’ సందడి తొలి రోజుకే పరిమితం కాగా.. వీకెండ్ వరకు ఓ మోస్తరుగా ఆడి చల్లబడిపోయింది. కానీ ‘మా ఊరి పొలిమేర-2’ మాత్రం నిలకడగా వసూళ్లు సాధిస్తోంది.

ఆ చిత్రానికి స్క్రీన్లు, షోలు కూడా పెరిగాయి. టాక్ ఏమంత గొప్పగా లేకపోయినా.. ఇందులోని ట్విస్టులు, థ్రిల్స్ టార్గెటెడ్ ఆడియన్స్‌ను మెప్పిస్తున్నాయి. అందుకే మంచి వసూళ్లు వస్తున్నాయి. ఈ సినిమా మీద పెట్టిన ఖర్చంతా ఒక్క నైజాం ఏరియా నుంచే వచ్చేయడం విశేషం. అన్ని ఏరియాల్లోనూ వీకెండ్లోనే బ్రేక్ ఈవెన్ అయిపోయి లాభాల బాట పట్టేసింది. ఫుల్ రన్లో ఈజీగా పది కోట్ల షేర్ మార్కును దాటేసేలా ఉంది ‘పొలిమేర-2’. ఈ సక్సెస్ మూడో పార్ట్‌‌కు మరింత ఊపునిచ్చేదే. దాన్ని మరింత పెద్ద రేంజిలో, ఇంకా ఉత్కంఠభరితంగా తీస్తే పెద్ద సక్సెస్ అవడం ఖాయం.