OG విడుదల హింట్ ఇచ్చారు కానీ

పవన్ కళ్యాణ్ అభిమానులు విపరీతమైన ఎగ్జైట్ మెంట్ తో ఎదురు చూస్తున్న ఓజి షూటింగ్ ప్రస్తుతం చిన్న బ్రేక్ లో ఉంది కానీ దర్శకుడు సుజిత్ మిగిలిన పనులన్నీ చకచకా పూర్తి చేస్తున్నాడు. హీరో డేట్లు ఇవ్వడం ఆలస్యం వీలైనంత ఎక్కువ భాగం తీసేసి రిస్క్ లేకుండా చూసుకుంటున్నాడు. ఇవాళ తన బర్త్ డే సందర్భంగా డివివి సంస్థ శుభాకాంక్షలు చెబుతూ ఓజిని ఈ ఏడాది పేల్చి పారేద్దాం అంటూ ట్వీట్ చేసింది. సాధారణంగా విడుదలను ఉద్దేశించి ఇలాంటి మాటలు వాడతారు. అంటే డిసెంబర్ లో ఓజి రావడం పక్కా ఏమోనని ఫ్యాన్స్ ఆశలు పెట్టుకోవడం మొదలుపెట్టారు.

కానీ ఏ కోణంలో చూసినా ఇది సాధ్యమయ్యే అవకాశాలు దాదాపుగా లేవు. ఎందుకంటే ఇంకా షూట్ చాలా బాలన్స్ ఉంది. డిసెంబర్ మొదటి వారంలో హాయ్ నాన్న, గ్యాంగ్స్ అఫ్ గోదావరి, ఆపరేషన్ వాలెంటైన్, ఎక్స్ ట్రాడినరి మ్యాన్ లు ఉన్నాయి.  వీటికి థియేటర్ల సర్దుబాటు చేయడమే పెద్ద తలనెప్పి. ఒకవేళ నిజంగా ఓజి కనక ఆ టైంలో ప్లాన్ చేసుకుంటే వీళ్ళు తప్పుకోవడం ఖాయం. కానీ ప్యాన్ ఇండియా రేంజ్ లో ఇంత బడ్జెట్ పెడుతున్నప్పుడు హడావిడిగా రిలీజ్ ప్లాన్ చేసుకోరు. పైగా అంచనాలు విపరీతంగా ఉండటంతో పోస్ట్ ప్రొడక్షన్ ని చాలా జాగ్రత్తగా చేసుకోవాల్సి ఉంటుంది.

సో లేనిపోని ఆశలు పెట్టుకోవడం కన్నా ఓజి వచ్చే ఏడాదే విడుదలవుతుందని ప్రిపేర్ కావడం అవసరం. ఏదో ఫ్లోలో పేల్చేద్దాం అన్నారు కానీ ఆచరణలో మాత్రం సులభం కాదు. ఏదైనా అనూహ్య పరిణామం జరిగితే తప్ప ఓజిని దగ్గరలో చూడలేం. ఇన్ సైడ్ టాక్ ప్రకారం ముందు డిసెంబరే అనుకున్న మాట వాస్తవం. అయితే చంద్రబాబునాయుడు అరెస్ట్ తర్వాత జనసేన కోసం పవన్ ఇంకా ఎక్కువగా రాజకీయ కార్యకలాపాలు చేయాల్సి వచ్చింది. దాంతో ఆ ప్రభావం నేరుగా ఓజి, ఉస్తాద్ భగత్ సింగ్ ల మీద పడింది. ఎన్నికల ముందే ఏదో ఒక సినిమా థియేటర్లలో రావడం పక్కానే. అదేంటంటేది తేలాలి.