వెంకటేష్ సినిమాకు సెకండాఫ్ సమస్య

పెళ్లి చూపులుతో పరిచయమై ఈ నగరానికి ఏమైంది రూపంలో యూత్ కో కల్ట్ క్లాసిక్ ఇచ్చిన దర్శకుడు తరుణ్ భాస్కర్ ఇంత సుదీర్ఘమైన కెరీర్ లో చేసింది రెండే సినిమాలు కావడం ఒక మంచి ఫిలిం మేకర్ కి గ్యాప్ వచ్చేలా చేసింది. అందుకే కీడా కోలా మీద చెప్పుకోదగ్గ అంచనాలున్నాయి. ట్రైలర్ చూశాక యూత్ లో క్రేజ్ వచ్చేలా ఉంది. ఇవాళ దీని లాంచ్ సందర్భంగా మీడియాతో ముచ్చటించిన తరుణ్ భాస్కర్ స్టేజి మీద పంచులు, సెటైర్లతో హోరెత్తించాడు. వెరైటీ ప్రశ్నలకు వ్యంగ్యంగా సమాధానం ఇస్తూ తన రియల్ కామెడీ టైమింగ్ ని మరోసారి బయట పెట్టుకున్నాడు.

గతంలో తరుణ్ భాస్కర్ వెంకటేష్ కో కథ చెప్పి దాదాపు గ్రీన్ సిగ్నల్ కూడా ఇప్పించుకున్నాడు. గుర్రపు పందేల నేపథ్యంలో ఒక డిఫరెంట్ బ్యాక్ డ్రాప్ తో ఇది ఉంటుందని సురేష్ సంస్థ వర్గాల నుంచి లీకులు కూడా వచ్చాయి. కట్ చేస్తే అది ఎంతకీ ముందుకు కదల్లేదు. నారప్ప, ఎఫ్ 3 కన్నా ముందు ఇదంతా జరిగింది. కానీ కార్యరూపం దాల్చలేదు. ఈ స్క్రిప్ట్ మీదే తరుణ్ చాలా సమయం వెచ్చించాల్సి వచ్చింది. అయితే సెకండ్ హాఫ్ సంతృప్తికరంగా రాకపోవడం వల్లే బ్రేక్ ఇవ్వాల్సి వచ్చింది తప్ప వెంకీ కాంబో భవిష్యత్తులో ఉంటుందనే సంకేతమైతే ఇచ్చాడు.

మొదలయ్యే దాకా దీన్ని గ్యారెంటీగా చెప్పలేని పరిస్థితి. పెద్ద హీరోను సరిగా హ్యాండిల్ చేయకపోతే వచ్చే విమర్శలు తెలుసు కనకే జాగ్రత్తగా ఉన్నానని తరుణ్ చెబుతున్న వర్షన్. ఇక్కడ కీడా కోలా సక్సెస్ కావడం చాలా కీలకం ఇది బ్లాక్ బస్టర్ అయితే వెంకీకి మరింత నమ్మకం కుదురుతుంది. సురేష్ సంస్థనే అంటిపెట్టుకుని ఉన్న ఈ క్రియేటివ్ డైరెక్టర్ బయటి బ్యానర్లకు ఇప్పట్లో చేసే సూచనలు కనిపించడం లేదు. కీడా కోలాలో కాంట్రాక్ట్ కిల్లర్ గా ఒక వెరైటీ పాత్ర పోషిస్తున్న తరుణ్ భాస్కర్ ముచ్చటగా మూడో హిట్టు కొడతాడో లేదో నవంబర్ మూడున తేలిపోనుంది. చూద్దాం.