ఆ స్టాలిన్ గిల్లుతుంటే.. ఈ స్టాలిన్ దువ్వుతున్నాడు

ఇంకొన్ని గంటల్లో ‘లియో’ సినిమా ప్రేక్షకుల ముందుకు రాబోతోంది. ప్రపంచవ్యాప్తంగా ఈ సినిమా భారీ స్థాయిలో రిలీజవుతోంది. ఈ ఏడాదికి బిగ్గెస్ట్ ఓపెనింగ్స్ తెచ్చుకునే సినిమాగా ‘లియో’ నిలిచే అవకాశాలను కొట్టిపారేయలేం. యుఎస్‌లో ఈ రోజు అర్ధరాత్రి సమయానికే ‘లియో’ షోలు మొదలైపోతాయి. తెలుగులో ఉదయం 7 గంటల నుంచే షోలు పడుతున్నాయి. కర్ణాటక, కేరళలో కూడా అర్లీ మార్నింగ్ షోలు ప్లాన్ చేశారు.

కానీ ఈ తమిళ సినిమాకు తమిళనాట మాత్రం ఉదయం 9 లోపు సినిమా చూసే అవకాశం లేదు. ఇది విజయ్ అభిమానులను తీవ్ర నిరాశకు గురి చేస్తోంది. ఒకప్పుడు ప్రతి పెద్ద సినిమాకు తెల్లవారుజామున 4 గంటలకే షోలు మొదలైపోయేవి. అప్పుడు అభిమానులు చేసే సందడి అంతా ఇంతా కాదు. కానీ ఈ మధ్య స్టాలిన్ సర్కారు బెనిఫిట్ షోల విషయంలో చాలా స్ట్రిక్టుగా ఉంటోంది. ఆ షోలన్నింటినీ రద్దు చేసింది.

త్వరలో విజయ్ రాజకీయ రంగప్రవేశం చేస్తాడని భావిస్తున్న నేపథ్యంలో ఉద్దేశపూర్వకంగా తన సినిమాను టార్గెట్ చేస్తున్నారని అతడి అభిమానులు ఆగ్రహం వ్యక్తం చేస్తున్నారు. ఐదు షోలకు పర్మిషన్ ఇచ్చి ఉదయం 9కి ముందు ప్రదర్శన మొదలు కాకూడదని అనడం ఏంటని వారు ప్రశ్నిస్తున్నారు. అర్లీ మార్నింగ్ షోల కోసం గవర్నర్‌ను కలిసినా, కోర్టుకు వెళ్లినా కూడా ఫలితం లేకపోయింది. ఉదయం 7 నుంచి షోలు మొదలయ్యేలా చూడాలని కోర్టు ప్రభుత్వానికి మార్గదర్శకాలు ఇచ్చినా కూడా స్టాలిన్ సర్కారు పట్టించుకోలేదు.

ఉదయం 9కే షోలు మొదలు అని స్పష్టం చేసింది. ఇది విజయ్ అభిమానులకు అస్సలు రుచించట్లేదు. ఈ పరిణామం స్టాలిన్ సర్కారుకు ప్రతికూలం అవుతుందనే చర్చ జరుగుతుండగా.. స్టాలిన్ తనయుడు ఉదయనిధి స్టాలిన్ లైన్లోకి వచ్చాడు. విజయ్ అభిమానులను శాంతింపజేయడానికా అన్నట్లు ‘లియో’ షో చూసి ట్వీట్ వేశాడతను. ఈ సినిమా అదిరిందని చెబుతూ, ఇది ‘ఎల్‌సీయూ’లో భాగం అనే హింట్ ఇచ్చేలా ట్వీట్ వేశాడు. దీంతో సీఎం స్టాలిన్ విజయ్ అభిమానులను గిల్లుతుంటే.. ఉదయనిధి స్టాలిన్ వాళ్లను దువ్వే ప్రయత్నం చేస్తున్నాడని కామెంట్లు చేస్తున్నారు నెటిజన్లు.