నాని వచ్చాడు.. ఖాళీ చేసేదెవరు?

గత వారం ఒకేసారి అరడజను సినిమాలు రిలీజయ్యాయి. ఇంత పోటీతో రావడం కొన్ని సినిమాలకు బాగా నెగెటివ్ అయింది. ‘చిన్నా’ లాంటి మంచి సినిమా ప్రేక్షకుల దృష్టిలో పడకుండానే వెళ్లిపోయింది. ఒక్క ‘మ్యాడ్’ మాత్రమే అవకాశాన్ని ఉపయోగించుకుంది. మిగతా సినిమాలన్నీ అడ్రస్ లేకుండా పోయాయి. వీటిలో రెండు మూడు సినిమాలు ఖాళీగా ఉన్న ఈ వీకెండ్‌లో రిలీజై ఉంటే కొంత మెరుగైన ఫలితం ఉండేదేమో.

సంక్రాంతి, దసరా లాంటి సీజన్లలో తప్పితే ఒకే వారం రెండుకు మించి సినిమాలు రిలీజైతే ఇబ్బందిగానే ఉంటుంది. ఈ విషయం తెలిసి కూడా డిసెంబరు రెండో వారానికి వరుసగా సినిమాలను రేసులో నిలబెట్టేస్తున్నారు. ముందుగా ఆ వీకెండ్‌కు వరుణ్ తేజ్ మూవీ ‘ఆపరేషన్ వాలెంటైన్’ను షెడ్యూల్ చేశారు. ఆ తర్వాత విశ్వక్సేన్ మూవీ ‘గ్యాంగ్స్ ఆఫ్ గోదావరి’ రేసులోకి వచ్చింది.

ఈ మధ్య ‘సలార్’ క్రిస్మస్‌కి షెడ్యూల్ అవ్వగానే.. ఆ టైంలో రావాల్సిన రెండు చిత్రాలను డిసెంబరు రెండో వారానికి తీసుకొచ్చారు. ఆల్రెడీ నితిన్ మూవీ ‘ఎక్స్‌ట్రా.. ఆర్డినరీ మ్యాన్’ను డిసెంబరు 8కి ఫిక్స్ చేసిన సంగతి తెలిసిందే. ఇప్పుడు నాని మూవీ ‘హాయ్ నాన్న’కు డిసెంబరు 7ను రిలీజ్ కోసం ఎంచుకున్నారు. ఐతే ఒక వీకెండ్లో ఇలాంటి నాలుగు పేరున్న సినిమాలను రిలీజ్ చేయడం అంటే చాలా కష్టమే. థియేటర్ల సర్దుబాటు అంత ఈజీ కాదు. దీనికి తోడు.. వసూళ్లలోనూ కోత ఉంటుంది. టాక్ తేడా వచ్చిన సినిమాలు దారుణంగా దెబ్బ తింటాయి. కాబట్టి రెండుకు మించి సినిమాలు రిలీజ్ చేయడం కష్టమే.

అతి కష్టం మీద ఇంకో సినిమాకు ఛాన్స్ ఉంటుంది. అది కూడా రిస్కే. కాబట్టి ఒకట్రెండు సినిమాలను వాయిదా వేయక తప్పదు. ఐతే ‘గ్యాంగ్స్ ఆఫ్ గోదావరి’ని డిసెంబరు 24కు వాయిదా వేస్తారని వార్తలు వచ్చాయి. కానీ ‘సలార్’తో పాటు ‘డుంకి’ కూడా అప్పుడే రిలీజ్ కాబోతున్నాయి. వాటి మధ్య వెళ్తే శాండ్‌విచ్ అయిపోయే ప్రమాదం ఉంటుంది. మరి విశ్వక్ అండ్ టీం ఏం చేస్తుందో చూడాలి.  ఇంకోవైపు పరిస్థితిని బట్టి ఎక్స్‌ట్రా, ఆపరేషన్ వేలంటైన్‌ల్లో ఒకటి వాయిదా పడే అవకాశాలు కూడా ఉన్నాయి. నాని సినిమా మాత్రం పక్కాగా డిసెంబరు 7నే వస్తుందని సమాచారం.