ముత్తయ్య 800 మెప్పించిందా లేదా

ఈ వారం విడుదలైన కొత్త సినిమాల్లో 800 మీద క్రికెట్ లవర్స్ కి సాఫ్ట్ కార్నర్ ఉంది. ప్రపంచపు అత్యుత్తమ స్పిన్నర్స్ లో టాప్ వన్ గా పేరు తెచ్చుకున్న ముత్తయ్య మురళీధరన్ జీవితంలోని ముఖ్య ఘట్టాలను తెరమీద చూసేందుకు ఉత్సాహం చూపించారు. దానికి తోడు ట్రైలర్ ఆసక్తికరంగా కట్ చేయడం, నిర్మాత శివలెంక కృష్ణప్రసాద్ పెద్ద రిలీజ్ వచ్చేలా చేయడం అంతో ఇంతో బజ్ తీసుకొచ్చాయి. ఒక రోజు ముందు కొన్ని ప్రీమియర్లు కూడా వేశారు. ఎంఎస్ శ్రీపతి దర్శకత్వం వహించిన ఈ స్పోర్ట్స్ డ్రామాకు జిబ్రాన్ సంగీతం అందించగా టైటిల్ రోల్ మధుర్ మిట్టల్ పోషించారు. ఇంతకీ మూవీ ఎలా ఉంది.

తమిళ సంతతికి చెందిన ముత్తయ్య మురళీధరన్(మధుర్ మిట్టల్) శ్రీలంక క్రికెట్ టీమ్ లో స్థానం సంపాదించేందుకు పోరాటం చేసి జట్టులో చేరి తన అఫ్ స్పిన్ తో విజయాలు సాధిస్తాడు. ఒక మ్యాచ్ లో ఆస్ట్రేలియా అంపైర్లు వేసిన నిందల వల్ల నిషేదానికి గురయ్యే పరిస్థితి వస్తుంది. ఈ వివాదం నుంచి బయటపడేందుకు ముత్తయ్య తన నిజాయితిని ఋజువు చేసుకోవాల్సిన అవసరం పడుతుంది. ఈ క్రమంలో తన బాల్యంతో మొదలుపెట్టి యుద్ధం లాంటి లైఫ్ జర్నీ ప్రపంచానికి పరిచయమవుతుంది. చివరికి ముత్తయ్య వరల్డ్ హయ్యెస్ట్ వికెట్ టేకర్ గా ఎలా ఎదిగాడనేది కథ.

ఒక క్రికెటర్ జర్నీని పారదర్శకంగా చూపించాలని ప్రయత్నం చేసిన దర్శకుడు శ్రీపతి దానికి సరిపడా డ్రామాను సరిగా రాసుకోలేదు. దీంతో ఎలాంటి హై మూమెంట్స్ లేకుండా నెరేషన్ చాలా నెమ్మదిగా సాగుతూ ఆసక్తిని తగ్గించేస్తుంది. మనకు అంతగా అవగాహన లేని ఈలం సంఘర్షణను ఇతర ప్రాంతాల వారికి అర్థమయ్యేలా చెప్పడంలో తడబడటంతో ముత్తయ్యతో ప్రయాణం ఆశించిన స్థాయిలో అనిపించదు. కొన్ని మంచి సన్నివేశాలు, ఎపిసోడ్లు ఉన్నప్పటికీ థియేటర్ ఎక్స్ పీరియన్స్ డిమాండ్ చేసే కంటెంట్ అయితే కాదు. ఓటిటిలో వచ్చినప్పుడు మురళీధరన్ కోసం చూడొచ్చు.