బుకింగ్స్ డల్.. టాక్ కీలకం

టాలీవుడ్ బాక్సాఫీస్‌లో కొన్ని వారాలుగా స్లంప్ నడుస్తోంది. ఈ నెలలో తొలి రెండు వారాల్లో ఖుషి, మిస్ శెట్టి మిస్టర్ పొలిశెట్టి లాంటి చెప్పుకోదగ్గ సినిమాలు రిలీజయ్యాయి. కానీ తర్వాతి వారాలను ఖాళీగా వదిలేశారు. వరుసగా రెండు వారాలు చెప్పుకోదగ్గ రిలీజ్‌లే లేవు. మళ్లీ చివరి వీకెండ్లో సందడి కనిపించేలా ఉంది. ఈ వారం స్కంద, చంద్రముఖి-2 లాంటి క్రేజీ చిత్రాలు.. ‘పెదకాపు’ లాంటి ఇంట్రెస్టింగ్ మూవీ రిలీజవుతున్నాయి. 

ఐతే ముందు వారాల్లోని డల్‌నెస్ ఇంకా కంటిన్యూ అవుతుండటం వల్లో ఏమో.. ఈ మూడు చిత్రాలకు అడ్వాన్స్ బుకింగ్స్ అయితే ఆశాజనకంగా లేవు. ఉన్నంతలో ‘స్కంద’ మూవీ పరిస్థితి బెటర్. అక్కడక్కడా ఫాస్ట్ ఫిల్లింగ్ షోలు చూపిస్తున్నాయి. కానీ బోయపాటి-రామ్ కాంబినేషన్ మూవీకి ఉండాల్సినంత క్రేజ్ అయితే లేదు. ఈ సినిమా ఫస్ట్ ట్రైలర్, పాటల వల్ల బజ్ తగ్గిపోవడం ప్రభావం చూపించినట్లు కనిపిస్తోంది.

ఇక ‘చంద్రముఖి-2’కు ముందు నుంచి పెద్దగా బజ్ లేదు. సినిమా సోషల్ మీడియాలో ట్రోలింగ్‌కు గురవుతూ వస్తోంది. ఈ సినిమా ప్రోమోలు కూడా ఏమంత ఆసక్తికరంగా అనిపించలేదు. ఇక ‘పెదకాపు’ ప్రోమోలు బాగున్నా.. కొత్త హీరో కావడం మైనస్ అవుతోంది. ఇప్పటికైతే ప్రేక్షకులు ఆ సినిమాను పెద్దగా పట్టించుకున్నట్లు కనిపించడం లేదు. తక్కువ థియేటర్లలో అడ్వాన్స్ బుకింగ్స్ మొదలు కాగా.. వాటికీ స్పందన సరిగా లేదు. 

ఈ మూడు చిత్రాలకూ టాక్ కీలకం కానుంది. ఐతే స్కంద, చంద్రముఖి-2 మాస్ సినిమాలు కాబట్టి అడ్వాన్స్ బుకింగ్స్ ఎలా ఉన్నా.. రిలీజ్ టైంకి టార్గెట్ ఆడియన్స్ నేరుగా థియేటర్లకు పెద్ద సంఖ్యలోనే వస్తారని భావిస్తున్నారు. ‘పెదకాపు’ కంటెంట్ ఉన్న సినిమాలా కనిపిస్తోంది కాబట్టి.. టాక్ బాగుంటే అది కూడా పుంజుకుంటుంది. మరి ఈ వారం అయినా బాక్సాఫీస్’లో తిరిగి సందడి నెలకొంటుందేమో చూడాలి.