Gulte Telugu Telugu Political and Movie News Updates
ఆర్టిస్టులకు పాత్రల విషయంలో పరిమితులేమీ ఉండవు. ఒక సినిమాలో ఓ హీరోకు హీరోయిన్‌గా నటించిన నటి.. ఇంకో సినిమాలో చెల్లెలిగా నటిస్తుంటుంది. అలాగే హీరోయిన్‌గా చేసిన వాళ్లే తల్లి పాత్రలో నటించిన సందర్భాలూ ఉన్నాయి. ‘సైరా’లో చిరుకు జోడీగా చేసిన నయనతార.. ‘గాడ్ ఫాదర్’లో చెల్లెలి పాత్రలో కనిపించిన సంగతి తెలిసిందే.
ఐతే ఒక సినిమాలో తనకు కూతురిగా నటించిన అమ్మాయిని తర్వాత తనకు హీరోయిన్‌గా పెడితే నో అనేశాడట కోలీవుడ్ నటుడు విజయ్ సేతుపతి. అతను విలన్ పాత్రలో నటించిన ‘ఉప్పెన’ చిత్రంలో కృతి శెట్టి కూతురిగా చేసిన సంగతి తెలిసిందే. ఈ అమ్మాయిని తర్వాత సేతుపతి తమిళంలో నటించే ఓ సినిమాకు హీరోయిన్‌గా ఎంపిక చేశాడట దర్శకుడు.
ఐతే హీరోయిన్ తనే అంటూ ఫొటో చూపించగానే సేతుపతి నో అనేశాడట. తన కూతురిగా చేసిన అమ్మాయితో తాను రొమాన్స్ చేయలేనని అతను తేల్చి చెప్పేశాడట. ఐతే సినిమాలో చేసిన పాత్రను ఇంత సీరియస్‌గా తీసుకోవడం ఏంటి అని సేతుపతిని అడిగితే.. అందుకు కారణం చెప్పాడు.
‘ఉప్పెన’ సినిమా క్లైమాక్స్ సీన్లో కృతి చాలా ఇబ్బంది పడుతుంటే.. తనకు నిజ జీవితంలో ఇంతే వయసున్న కూతురు ఉందని.. కాబట్టి నువ్వు కూడా నా కూతురి లాంటి దానివే అని సర్దిచెప్పానని.. తనను నిజంగా ఓ తండ్రిలా ఫీలై ఈ సీన్ పూర్తి చేయమని అనడంతో ఆమె టెన్షన్ వదిలిపెట్టి ఆ సీన్ చేసిందని సేతుపతి వెల్లడించాడు. తాను కూడా కృతిని నిజంగా తన కూతురి లాగే ఫీలయ్యానని.. అందుకే ఆమె హీరోయిన్‌గా వద్దని తేల్చి చెప్పేశానని.. దీంతో తన స్థానంలో వేరే అమ్మాయిని తీసుకున్నారని సేతుపతి తెలిపాడు.
