గాడ్ ఫాదర్ నిర్లక్ష్యం – సామిరంగ జాగ్రత్త

ఒక సినిమా రీమేక్ ఎంచుకునే టైంలో దాని ఒరిజినల్ వెర్షన్ అందుబాటుని చెక్ చేసుకోవడం చాలా అవసరం. ఎందుకంటే ఇప్పటి ప్రేక్షకులు మరీ తెలివి మీరిపోయి ఎక్కడుందో వెతుక్కుంటున్నారు. బాష రాకపోతే సబ్ టైటిల్స్ సహాయంతో చూస్తున్నారు. లూసిఫర్ ని గాడ్ ఫాదర్ గా మొదలుపెట్టే టైంకి దాని తెలుగు డబ్బింగ్ తో సహా అమెజాన్ ప్రైమ్ లో అందుబాటులో ఉంది. కానీ నిర్మాతలు ఆర్బి చౌదరి, ఎన్విఎస్ ప్రసాద్ ల నిర్లక్ష్యం వల్ల దాని తీయించే దిశగా ఎవరూ చర్యలు చేపట్టలేదు. ఫలితంగా ఎలాంటి కష్టం లేకుండా శుభ్రంగా మోహన్ లాల్ వెర్షన్ ని మన జనాలు చూసేశారు.

దాని ప్రభావం గాడ్ ఫాదర్ మీద గట్టిగానే పడింది. సెకండ్ హాఫ్ కొన్ని మార్పులు చేసినప్పటికీ అసలుదే బాగుందనే ఫీలింగ్ తెప్పించేశారు. దీని సంగతలా ఉంటే నా సామిరంగా విషయంలో మాత్రం అలాంటి పొరపాటుకి తావివ్వడం లేదు. దీని మాతృక పోరంజు మరియం జొస్ కొన్ని నెలల క్రితం వరకు ప్రైమ్ లో ఉండేది. కానీ ఇప్పుడు తీసేశారు. నాగ్ తన పలుకుబడి వాడి లేకుండా చేశారా లేక ముందస్తు అగ్రిమెంట్ లో భాగంగా వెళ్ళిపోయిందా అనేది తెలియదు కానీ అదే పనిగా చూద్దామని వెతకడానికి వెళ్లిన మూవీ లవర్స్ సెర్చ్ లో దొరక్క నిరాశ చెందుతున్నారు.

ఇదో మంచి స్ట్రాటజీ. ఇలా చేయడం వల్ల మొత్తం కట్టడి అయిపోతుందని కాదు. ఆన్ లైన్ పరిజ్ఞానం ఉన్న వాళ్ళు ఏదోలా ప్రింట్ పట్టుకుంటారు కానీ సామాన్య ప్రేక్షకులు మాత్రం లేదు కదాని అసలు సినిమా కోసం ఎదురు చూస్తారు. ఇకపై కూడా హక్కులు కొనే సమయంలో నిర్మాతలు ఈ జాగ్రత్త  తీసుకుంటే సోషల్ మీడియా దాడిని సగం తప్పించుకోవచ్చు. లేకపోతే పోలికలు తీసుకొచ్చి లేనిపోని రచ్చ చేస్తారు. టీజర్ తోనే హైప్ తెచ్చేసుకున్న నా సామిరంగా రెగ్యులర్ షూటింగ్ వచ్చేనెల నుంచే ఏకధాటిగా జరగబోతోంది. బ్రేక్స్ లేకుండా షెడ్యూల్స్ ని ప్లాన్ చేస్తున్నారట.