స్టాలిన్ కాంబినేషన్ ఎలా సాధ్యం

భోళా శంకర్ దారుణ ఫలితం తర్వాత చిరంజీవి తన నిర్ణయాలని పునః సమీక్షించుకుంటున్న మాట వాస్తవం. ఆల్రెడీ కమిటైనవి కూడా విశ్లేషించుకోవాల్సిన పరిస్థితి తలెత్తింది. ఈ నేపథ్యంలో కళ్యాణ్ కృష్ణ తో ప్లాన్ చేసుకున్న ఫ్యామిలీ ఎంటర్ టైనర్ ని వాయిదా వేస్తున్నారనే వార్త ఫిలిం నగర్ వర్గాల్లో హాట్ టాపిక్ గా మారింది. అసలే ఇది బ్రో డాడీ రీమేకనే ప్రచారం విపరీతంగా తిరిగింది. మెగా ఫ్యాన్స్ తమ వ్యతిరేకతను వ్యక్తం చేశారు కూడా. అయితే అనఫీషియల్ గా దీన్ని ఖండిస్తూ వచ్చిన రైటర్స్ టీమ్ అధికారికంగా ఎలాంటి ప్రకటన చేయలేకపోయింది. ఇప్పుడో కొత్త ట్విస్టు వచ్చి పడింది.

చిరు తమిళ దర్శకుడు మురుగదాస్ కాంబోలో ఓ ప్రాజెక్టు ఉండబోతోందనే టాక్ ఊపందుకుంది. ప్రాక్టికల్ గా ఆలోచిస్తే ఇది అంత సులభంగా సాధ్యం కాదు. ఎందుకంటే దాస్ ఇప్పటికే శివ కార్తికేయన్ తో ఓ మూవీని ప్లాన్ చేసుకున్నారు. మృణాల్ ఠాకూర్ హీరోయిన్ గా ప్రాధమిక చర్చలు కూడా జరిగాయని చెన్నై మీడియాలో వచ్చింది. సంగీత దర్శకుడిగా అనిరుద్ రవిచందర్ నే తీసుకోవాలని ప్రయత్నిస్తున్నట్టుగా తెలిసింది. ఈ నేపథ్యంలో హఠాత్తుగా దాన్నుంచి పక్కకు వచ్చేసి మురుగదాస్ మెగాస్టార్ తో చేతులు కలపడం ఏ కోణంలో చూసినా అనుమానమే.

ఈ ఇద్దరి కలయికలో స్టాలిన్ వచ్చింది. అంచనాలు పూర్తిగా అందుకోలేకపోయినా కంటెంట్ ప్లస్ చిరు హీరోయిజం ఫ్యాన్స్ కి బాగా నచ్చాయి. కానీ మురుగదాస్ చాలా కాలం నుంచే ఫామ్ లో లేరు. రజనీకాంత్ పిలిచి దర్బార్ ఇస్తే దాన్ని సద్వినియోగపరుచుకోలేదు. గజిని నాటి బ్రిలియంట్ మేకర్ ఆయనలో లేడని అభిమానులు ఫీలవుతుంటారు. అలాంటిది చిరంజీవి కోరిమరీ చేయమని చెప్తారా అంటే సందేహమే. ఇదే తరహాలో వివి వినాయక్ తోనూ చిరంజీవి చేస్తారనే లీక్ తిరుగుతోంది కానీ అది కూడా ఉత్తుత్తి పుకారేనని మెగా కాంపౌండ్ టాక్. చిన్న సర్జరీ కోసం ఢిల్లీ వెళ్లిన చిరు వచ్చాకే క్లారిటీ రావొచ్చు.