క‌ల్కి డేట్ అడిగిన రాజ‌మౌళికి కౌంట‌ర్లే కౌంట‌ర్లు

క‌ల్కి 2898 ఏడీగా మారిన ప్రాజెక్ట్‌-కే సినిమా నుంచి తాజాగా రిలీజైన ఫ‌స్ట్ గ్లింప్స్ సోష‌ల్ మీడియాను ఊపేస్తోంది. ప్ర‌భాస్ ఫ‌స్ట్ లుక్ చూసి చిత్ర బృందంపై తీవ్ర విమ‌ర్శ‌లు గుప్పించిన నెటిజ‌న్లు.. ఒక్క రోజు వ్య‌వ‌ధిలో త‌మ ఆలోచ‌న మార్చుకుని నాగ్ అశ్విన్ అండ్ టీంను కొనియాడుతున్నారు. ప‌క్కా ఇంట‌ర్నేష‌న‌ల్ మూవీలా క‌నిపిస్తున్న ఈ చిత్రం వ‌చ్చే ఏడాది వ‌ర‌ల్డ్ వైడ్ బాక్సాఫీస్ ద‌గ్గ‌ర సంచ‌ల‌నం రేప‌డం ఖాయంగా క‌నిపిస్తోంది.

టీజ‌ర్ చూసి ద‌ర్శ‌క ధీరుడు రాజ‌మౌళి సైతం అబ్బుర‌ప‌డ్డాడు. నాగి అండ్ టీం మీద ప్ర‌శంస‌ల జ‌ల్లు కురిపించాడు. దీంతో పాటు చివ‌ర్లో చిన్న పంచ్ లైన్ లాంటిది పెట్టాడు జ‌క్క‌న్న‌. ఇక స‌మాధానం తెలియాల్సిన ప్ర‌శ్న ఒక్క‌టే అని.. అదే రిలీజ్ డేట్ ఎప్పుడు? అని రాజ‌మౌళి పేర్కొన్నాడు. ఈ ప్ర‌శ్న సోష‌ల్ మీడియాలో మంచి వినోదానికి తెర తీసింది.

రాజ‌మౌళి మీద ఆయ‌న సన్నిహితుల‌తో పాటు నెటిజ‌న్లు చాలామంది కౌంట‌ర్లు వేస్తున్నారు. స్వ‌యంగా బాహుబ‌లి నిర్మాత శోభు యార్ల‌గ‌డ్డ‌.. ఈ ట్వీట్‌పై స‌ర‌దాగా స్పందించారు. రిలీజ్ డేట్ గురించి అడుగుతున్న‌ది ఎవ‌రో చూశారా అని ఆయ‌న అన్నారు. దీనికి  రాజ‌మౌళి త‌న‌యుడు కార్తికేయ న‌వ్వుల ఎమోజీలు పెట్టాడు. రాజ‌మౌళి సినిమాలంటేనే రిలీజ్ డేట్ల విష‌యంలో ఎప్పుడూ క్లారిటీ ఉండ‌దు.

చెప్పిన డేట్‌కు క‌ట్టుబ‌డ‌టం రాజ‌మౌళికి చాలా సినిమాల నుంచి అల‌వాటు లేదు. ఈగ‌, బాహుబ‌లి-1, బాహుబ‌లి-2, ఆర్ఆర్ఆర్.. ఇలా ప్ర‌తి సినిమా కూడా డేట్ మార్చుకున్న‌దే. వాయిదాల మీద వాయిదాలు ప‌డ్డ‌దే. ఆర్ఆర్ఆర్ అయితే ఎన్నిసార్లు డేట్ మార్చుకుందో లెక్క లేదు. ఇలాంటి చ‌రిత్ర ఉన్న జ‌క్క‌న్న క‌ల్కి సినిమా  రిలీజ్ డేట్ గురించి అడ‌గ‌డంతో నెటిజ‌న్లు ఆయ‌న మీద కౌంట‌ర్లు వేస్తున్నారు. దీని మీద స‌ర‌దా కామెంట్లు, మీమ్స్ చాలానే క‌నిపిస్తున్నాయి.