బన్నీ లీక్.. పిచ్చ లైట్

ఒక టాప్ హీరో ఓ పెద్ద సినిమాలో నటిస్తున్న సమయంలో బయట వేరే ఏ సినిమా వేడుకకు వచ్చినా.. అభిమానులు అతను చేస్తున్న సినిమాకు సంబంధించిన విశేషాలు పంచుకోవాలని గొడవ చేస్తుంటారు. ఆ వేడుక జరుగుతున్న సినిమా సైడ్ అయిపోయేలా ఉంటుంది వాళ్ల గొడవ. స్టార్ హీరోలు సాధ్యమైనంత వరకు తన సినిమా నుంచి అభిమానులను డీవియేట్ చేయడానికే ప్రయత్నిస్తారు. కానీ అల్లు అర్జున్ మాత్రం అలా కాకుండా అభిమానులు మరీ డిమాండ్ చేయకపోయినా.. తన కొత్త చిత్రం ‘పుష్ప-2’ నుంచి ఒక డైలాగ్‌ను లీక్ చేసి అందరినీ ఆశ్చర్యానికి గురి చేశాడు.

అసలు ముందు తనకు ఆ డైలాగ్ లీక్ చేసే ఉద్దేశమే లేదంటూనే.. ‘పుష్ప-2’ నుంచి ‘‘ఈడంతా జరిగేదంతా ఒకటే రూల్ మీద జరుగుతా ఉండాది. పుష్ప గాడి రూల్’’ అనే డైలాగ్‌ను బన్నీ చెప్పి అభిమానులను అలరించాడు.

ఐతే సినిమాలో ఒకటే లైన్ ఉంటుంది అని చెబుతూ డైలాగ్ లీక్ చేస్తున్నాడంటే.. ఫస్ట్ పార్ట్‌లోని ‘‘తగ్గేదే లే’’ టైపులో ఏదైనా పంచ్ లైన్ చెబుతాడేమో అనుకున్నారు అభిమానులు. కానీ దానికి భిన్నంగా ఏదో డైలాగ్ చెప్పాడు బన్నీ. అదైతే మరీ కిక్కిచ్చేలా ఏమీ లేదు. జనాలు మరీ చర్చించుకునేంత బలమైన డైలాగ్ ఏమీ కాదది. సుక్కు మార్కు కూడా ఏమీ కనిపించని ఈ డైలాగ్ విషయంలో నెటిజన్లు మామూలుగానే స్పందిస్తున్నారు.

ఏదో అభిమానులకు కొంచెం ఉత్సాహాన్నివ్వడానికి ‘పుష్ప-2’ పేరు ఎత్తి డైలాగ్ చెప్పాడే తప్ప.. ఇది అందరూ ఆశ్చర్యపోయే లీక్ అయితే కాదు. కాబట్టి సుకుమార్ అండ్ కో కూడా పెద్దగా కంగారు పడట్లేదని తెలుస్తోంది. కానీ ఫస్ట్ పార్ట్‌లో మాదిరే ఇందులోనూ పవర్ ఫుల్ డైలాగులు.. సోషల్ మీడియాను ఊపేసే పాటలకు అయితే కొదవ లేదట. ఇప్పటికే దేవిశ్రీ ప్రసాద్ సినిమాకు సంబంధించి రెండు పాటలు కూడా రికార్డ్ చేసేసినట్లు సమాచారం.