ఇండియన్ సినిమాలపై ప్రియాంక వ్యాఖ్యల దుమారం

సౌత్ నుంచి బాలీవుడ్‌కు వెళ్లిన హీరోయిన్లు.. ఇక్కడి సినిమాల గురించి కౌంటర్లు వేస్తుంటారు. అలాగే బాలీవుడ్ నుంచి హాలీవుడ్‌కు వెళ్లిపోయిన ప్రియాంక చోప్రా కూడా తరచుగా ఇక్కడి సినిమాలు, ఇండస్ట్రీ గురించి కొంచెం తక్కువ చేసే మాట్లాడుతోందన్న విమర్శలు ఉన్నాయి. బాలీవుడ్లో తనకు వ్యతిరేకంగా కొన్ని గ్యాంగ్స్ తయారయ్యాయని.. తనను దెబ్బ కొట్టడానికి వాళ్లు ప్రయత్నించారని.. అందుకే బాలీవుడ్‌ను వదిలేసి హాలీవుడ్‌కు వెళ్లాల్సి వచ్చిందని ఆమె గతంలో వ్యాఖ్యానించడం బాలీవుడ్ వర్గాల్లో దుమారం రేపింది.

ఇక ఈ మధ్యే తాను ‘ఆర్ఆర్ఆర్’ సినిమా చూడలేదని.. అందుకు తనకు ఖాళీ దొరకలేదని ప్రియాంక వ్యాఖ్యానించడం విమర్శలకు దారి తీసింది. అంతర్జాతీయ స్థాయిలో ప్రకంపనలు రేపిన ‘ఆర్ఆర్ఆర్’ సినిమా చూసేందుకు ప్రియాంకకు ఖాళీ దొరకలేదా అంటూ ఆమె మీద పంచులు వేశారు నెటిజన్లు. కట్ చేస్తే ఇప్పుడు ప్రియాంక భారతీయ సినిమాల్లో హీరోయిన్లను చూపించే విధానం గురించి కౌంటర్లు వేసినట్లుగా విమర్శలు ఎదుర్కొంటోంది.

ఆమె ఇటీవల ఒక అంతర్జాతీయ సినీ వేడుకలో తనను ఇంటర్వ్యూ చేస్తున్న అమ్మాయికి భారతీయ సినిమాల్లో డ్యాన్సులు ఎలా ఉంటాయో చేసి చూపించింది. ఇండియన్ సినిమాలంటే నడుము.. ఎదభాగమే అని పేర్కొంటూ ఇక్కడి సినిమాల్లో స్టెప్స్ ఎలా ఉంటాయో చేసి చూపించింది. ప్రియాంక క్యాజువల్‌గానే ఇలా చేసినట్లు అనిపించినా.. ఆమె ఇండియన్ సినిమాలను కించపరిచేలా ప్రవర్తించిందని.. ఎంత హాలీవుడ్లో బిజీ అయినా కూడా ఇంత వెటకారం పనికిరాదని ఆమె మీద నెటిజన్లు విమర్శలు గుప్పిస్తున్నారు. ప్రియాంక నటించిన హాలీవుడ్ సిరీస్ ‘సిటాడెల్’ కొన్ని నెలల కిందటే అమేజాన్ ప్రైమ్‌లో రిలీజైన నెగెటివ్ టాక్ తెచ్చుకున్న సంగతి తెలిసిందే.