9 సినిమాలు వస్తున్నా ఉత్సాహం ఏదీ

ఆదిపురుష్ ఊహించిన దానికన్నా తీవ్రంగా వీక్ డేస్ లో డ్రాప్ కావడంతో బయ్యర్ల ఆశలన్నీ కొత్త సినిమాల మీదే ఉన్నాయి ఒక రెండు మూడు వారాలు హౌస్ ఫుల్ బోర్డులు చూస్తామనే ఆశలపై దర్శకుడు ఓం రౌత్ నీళ్లు జల్లడంతో టికెట్ రేట్లు పెంచుకున్న ప్రయోజనం దక్కలేదు. మొదటి మూడు రోజులు రిలీజ్ కు ముందు వచ్చిన క్రేజ్ వల్ల అడ్వాన్స్ బుకింగ్స్ పుణ్యమాని ఎక్కువ ఫిగర్లు వచ్చాయి కానీ లేదంటే పరిస్థితి ఇంకోలా ఉండేది. సరే ఇలాంటివి ఎన్నో చూసిన బాక్సాఫీస్ కు ఇదేమీ కొత్త కాదు కానీ రేపు ఏకంగా తొమ్మిది రిలీజులున్నా హైప్ మాత్రం కనిపించడం లేదు.

ప్రముఖ నిర్మాత బిబిఎస్ ప్రసాద్ ‘కవిన్స్’ని అందిస్తున్నారు. డిస్ట్రిబ్యూషన్ సపోర్ట్ అయితే ఉంది కానీ ప్రేక్షకులకు మాత్రం ఇదొకటి వస్తుందన్న సంగతే రిజిస్టర్ కాలేదు. ఎప్పటి నుంచో వాయిదా పడుతూ వచ్చిన ‘మను చరిత్ర’కు బజ్ లేకపోయినా ట్రైలర్ ఏదో డిఫరెంట్ గా అనిపించింది. తెలంగాణ బ్యాక్ డ్రాప్ లో వస్తున్న మరో చిత్రం ‘భీమదేవరపల్లి బ్రాంచ్’ ఏదైనా బలగం లాంటి టాక్ తెచ్చుకుంటే తప్ప కష్టమే. భారీ తారాగణం, కర్ణ,  మా ఆవారా జిందగీ, కుట్ర-ది గేమ్ స్టార్ట్స్ నౌ, జాగ్రత్త బిడ్డ ఇలా లిస్టేమో పొడుగ్గా ఉంది కానీ బుకింగ్స్ మాత్రం లేవు

బాలీవుడ్ హారర్ మూవీ 1920 హరర్స్ అఫ్ ది హార్ట్, డిస్నీ యానిమేషన్ చిత్రం ఎలిమెంటల్స్ కూడా రేపే వస్తున్నాయి. మల్టీప్లెక్స్ జనాలకు తప్ప వీటి గురించి తెలిసిన బాపతు తక్కువే. ఇవన్నీ గమనిస్తే అటుఇటుగా ప్రభాస్ కే ఇంకో ఛాన్స్ దొరికినట్టు అయ్యింది.  నెగటివిటీని మర్చిపోయి ప్రేక్షకులు తండోపతండాలుగా వచ్చేయరు కానీ ఏదో ఒకటి థియేటర్లో చూడకపోతే టైం పాస్ కానివాళ్ళు ఆదిపురుష్ కు ఓటేసే ఛాన్స్ లేకపోలేదు. పైన చెప్పిన కొత్త రిలీజులన్నీ ఆషామాషీగా కాకుండా బ్రహ్మాండంగా ఉన్నాయనే టాక్ వస్తే తప్ప నిలదొక్కుకోవడం కష్టం