అప్పుడు కామెడీ అయ్యాడు.. ఇప్పుడు సెట్టయ్యాడు

విలన్లుగా భయపెట్టిన వాళ్లు తర్వాతి రోజుల్లో కమెడియన్లుగా అలరించిన సందర్భాలున్నాయి. కానీ కామెడీతో నవ్వించిన వాళ్లు విలన్లుగా మారడం అరుదు. అలా మారినా ప్రేక్షకుల ఆమోదం పొందడం కష్టమే. కామెడీ రోల్స్ నుంచి హీరోగా మారిన సునీల్ కొన్ని విజయాలందుకున్నాడు కానీ.. ఆ తర్వాత అతడికి గడ్డు పరిస్థితులు ఎదురయ్యాయి. మళ్లీ కామెడీ రోల్స్ చేస్తే అవేవీ సరిగా పండలేదు.

దీంతో రూటు మార్చి విలనీ మీద దృష్టిసారించాడతను. రవితేజ హీరోగా నటించిన ‘డిస్కో రాజా’లో అతను విలన్ పాత్రతో పెద్ద షాకిచ్చే ప్రయత్నం చేశాడు. కానీ ఆ పాత్ర విలన్ అని చివర్లో తెలుస్తుంది. ఐతే ఆ ట్విస్టు చూసి షాకవ్వడం పోయి జనాలు నవ్వుకున్నారు.

సునీల్‌ను విలన్ పాత్రలో అస్సలు ఊహించుకోలేకపోయారు జనాలు. ఆ పాత్రను సినిమాలో ప్రెజెంట్ చేసిన విధానం కూడా ఏమీ బాగా లేకపోయింది. అలా అని సునీల్ ఏమీ తన ప్రయత్నం ఆపేయలేదు. మళ్లీ విలన్‌గా ట్రై చేశాడు. కానీ ఈసారి మాత్రం అది వర్కవుటయ్యేలాగే కనిపిస్తోంది.

తాజాగా రిలీజైన ‘కలర్ ఫొటో’ టీజర్లో సునీల్ విలన్‌గా ఆకట్టుకున్నాడు. నెగెటివ్ రోల్‌లో మంచి ఇంపాక్టే చూపించాడు. అతడి లుక్స్, డైలాగ్ అన్నీ బాగానే కుదిరాయి. సినిమాలో ఈ పాత్ర ఏ మేర పండుతుందన్నది పక్కన పెడితే.. ముందు సునీల్‌ను విలన్‌గా యాక్సెప్ట్ చేసేలా ప్రేక్షకులకు ఒక ఫీలింగ్ తీసుకురావడంలో టీజర్ విజయవంతమైంది. సినిమాలో సునీల్ క్యారెక్టర్ అంచనాలకు తగ్గట్లుంటే.. అతను ఇకపై నెగెటివ్ రోల్స్‌కు షిఫ్ట్ అయిపోవచ్చేమో.