వ‌రుణ్‌, లావ‌ణ్య పెళ్లిపై మ‌ళ్లీ రూమ‌ర్లు?

ఒక హీరో హీరోయిన్ క‌లిసి న‌టించిన సినిమా హిట్ కాక‌పోయినా.. వాళ్లిద్ద‌రూ వ్య‌క్తిగ‌తంగా ద‌గ్గ‌రై జంట‌గా మారిన ఉదంతాలు సినీ రంగంలో ఉన్నాయి. మ‌హేష్ బాబు, న‌మ్ర‌త జోడీ వంశీ అనే డిజాస్ట‌ర్ మూవీ మేకింగ్ టైంలో ఒక‌రికొక‌రు ద‌గ్గ‌రై త‌ర్వాత పెళ్లి చేసుకున్న సంగ‌తి తెలిసిందే. ఇలాగే టాలీవుడ్లో మ‌రో జంట ఒక్క‌ట‌వ‌బోతున్న‌ట్లుగా చాన్నాళ్ల నుంచి చ‌ర్చ జ‌రుగుతోంది.

మిస్ట‌ర్, అంత‌రిక్షం లాంటి ఫ్లాప్ సినిమాల్లో క‌లిసి న‌టించిన వ‌రుణ్ తేజ్, లావ‌ణ్య త్రిపాఠి ప్రేమ‌లో ఉన్న‌ట్లు ఎప్ప‌ట్నుంచో ప్ర‌చారం జ‌రుగుతోంది. కానీ ఇప్ప‌టిదాకా వీళ్లిద్ద‌రూ దీని గురించి ఓపెన్ అయింది లేదు. ఒక ద‌శ‌లో ఇద్ద‌రూ సీక్రెట్‌గా ఎంగేజ్మెంట్ చేసుకున్న‌ట్లు కూడా గుస‌గుస‌లు వినిపించాయి. కానీ అది నిజం కాద‌ని త‌ర్వాత తేలింది. త‌న కొడుక్కి అతి త్వ‌ర‌లో పెళ్లి చేయ‌బోతున్న‌ట్లు నాగ‌బాబు చెబుతున్నాడు కానీ.. ఆ ఘ‌డియ‌లైతే ఇంకా రాలేదు.

ఐతే ఇప్పుడు వ‌రుణ్‌, లావ‌ణ్య ప్రేమాయ‌ణం మ‌రోసారి హాట్ టాపిక్‌గా మారింది. వీళ్లిద్ద‌రూ పెళ్లికి రెడీ అయిపోయార‌ని.. ఇరు కుటుంబాల మ‌ధ్య అంగీకారం కూడా కుదిరింద‌ని జోరుగా ప్ర‌చారం జ‌రుగుతోంది. వ‌చ్చే నెల‌లో వ‌రుణ్‌, లావ‌ణ్య‌ల‌కు నిశ్చితార్థం కూడా జ‌ర‌గ‌నున్న‌ట్లు సోష‌ల్ మీడియాలో వార్త‌లు ఊపందుకున్నాయి.

లావ‌ణ్య‌.. మెగా ఫ్యామిలీలో జ‌రిగిన కొన్ని వేడుక‌ల్లో క‌నిపించ‌డంతో వ‌రుణ్‌కు ఆమెకు మ‌ధ్య ఏదో ఉంద‌నే గుస‌గుస‌లు మొద‌ల‌య్యాయి. కానీ వ‌రుణ్‌, లావ‌ణ్య క‌లిసి అయితే బ‌య‌ట ఎక్క‌డా క‌నిపించ‌లేదు. వీరి మ‌ధ్య ఏమీ లేద‌ని కొంద‌రు కొట్టిప‌డేస్తున్నా.. త‌ర‌చుగా ఈ జంట గురించి రూమ‌ర్లు అయితే ఆగ‌ట్లేదు. మ‌రి ఈసారి ఏకంగా ఎంగేజ్మెంట్ అని వార్త‌లొస్తున్న నేప‌థ్యంలో ఏం జ‌రుగుతుందో చూడాలి.