హ్యాట్రిక్ కొడతారా.. ద్వితీయ విఘ్నం దాటుతారా?

సినీ ప్రియుల కోసం శుక్రవారం మళ్లీ కొత్త సినిమాలను మోసుకొచ్చేసింది. ఈసారి రెండు క్రేజీ చిత్రాలు ప్రేక్షకులను పలకరించబోతున్నాయి. ఒకటి ‘రామబాణం’ కాగా.. ఇంకోటి ‘ఉగ్రం’. ఈ రెండు చిత్రాలకూ ఒక విషయంలో సారూప్యత ఉంది. వీటిని రూపొందించిన దర్శకులు, అందులో నటించిన హీరోలది సక్సెస్ ఫుల్ కాంబినేషన్.

ఇంతకుముందు మంచి విజయాలందుకున్న జోడీలు.. మరోసారి బాక్సాఫీస్ పరీక్షకు సిద్ధమయ్యాయి. గోపీచంద్ కెరీర్లో బిగ్గెస్ట్ హిట్లుగా నిలిచిన లక్ష్యం, లౌక్యం సినిమాలను రూపొందించిన శ్రీవాస్.. చాలా గ్యాప్ తర్వాత అతడితో జట్టు కట్టాడు. వీరి కలయికలో హ్యాట్రిక్ సినిమా అవుతుందని ‘రామబాణం’ మీద ఆశలు పెట్టుకున్నారు. కాకపోతే ‘లౌక్యం’ చేసే సమయానికి.. ఇప్పటికి వీళ్లిద్దరి జాతకాలు మారిపోయాయి. గోపీచంద్ వరుస పరాజయాలతో సతమతం అవుతున్నాడు. అతడి చివరి సినిమా ‘పక్కా కమర్షియల్’ చేదు అనుభవాన్ని మిగిల్చింది.

శ్రీవాస్ ట్రాక్ రికార్డు కూడా బాగా లేదు. డిక్టేటర్, సాక్ష్యం సినిమాలు తీవ్ర నిరాశకు గురి చేశాయి. కాంబినేషన్ క్రేజీగానే ఉన్నా ‘రామబాణం’ ట్రైలర్ చూస్తే మరీ అంచనాలు పెట్టుకోదగ్గ సినిమాలా కనిపించలేదు. మరి తమ కెరీర్లకు ఎంతో కీలకమైన సినిమాతో గోపీ, శ్రీవాస్ హ్యాట్రిక్ కొడతారా లేదా అన్నది చూడాలి. ఇక ‘ఉగ్రం’ విషయానికి వస్తే.. ‘నాంది’ లాంటి మంచి, హిట్ సినిమా తర్వాత అల్లరి నరేష్, విజయ్ కనకమేడల కలిసి చేసిన సినిమా ఇది.

తొలి చిత్రం లాగే ఈసారి కూడా సామాజిక అంశాలకు పెద్ద పీట వేస్తూ సీరియస్ సినిమా చేశారు. ఒకప్పడు కామెడీకి కేరాఫ్ అడ్రస్‌గా ఉన్న నరేష్.. ఈ సినిమా కోసం చాలా సీరియస్‌గా, వయొలెంట్‌గా ఉండే పాత్ర చేయడం విశేషమే. తొలి సినిమాతో ప్రతిభ చాటిన విజయ్ మీద మంచి అంచనాలే ఉన్నాయి. మరి విజయ్, నరేష్ కలిసి ద్వితీయ విఘ్నాన్ని దాటి మరో సక్సెస్ అందుకుంటారా అన్నది చూడాలి.