డిసెంబర్ రిస్కుకి సై అంటున్న నాని

నెలల తరబడి ముందే బాక్సాఫీస్ క్లాషులు రెడీ అవుతున్నాయి. విడుదల తేదీలు లాక్ చేసుకోకపోతే వచ్చే సమస్యలను గుర్తించి నిర్మాతలు అడ్వాన్సవుతున్నారు. ఇటీవలే దసరాతో మాస్ బ్లాక్ బస్టర్ తన ఖాతాలో వేసుకున్న న్యాచురల్ స్టార్ నాని తన 30వ సినిమాలో ఓ పాప తండ్రిగా నటించబోతున్న సంగతి తెలిసిందే. ధరణిగా చేసిన వయొలెంట్ పాత్రకు పూర్తిగా భిన్నంగా ఇది ఉండబోతోంది. షౌర్యువ్ దర్శకత్వం వహిస్తున్న ఈ ఎమోషనల్ డ్రామాలో సీతారామం ఫేమ్ మృణాల్ ఠాకూర్ హీరోయిన్ గా నటిస్తోంది. హేశం అబ్దుల్ వాహాబ్ సంగీత దర్శకుడిగా పరిచయం కాబోతున్నారు.

ఇప్పుడీ మూవీ రిలీజ్ డేట్ అఫీషియల్ గా లాక్ అయ్యింది. ఈ ఏడాది డిసెంబర్ 21న వరల్డ్ వైడ్ థియేటర్లలో తీసుకురాబోతున్నట్టు అధికారికంగా ప్రకటించారు. ఇక్కడ ట్విస్ట్ ఏంటంటే దీని ముందు వెనుక గట్టి పోటీ ఉంది. 22న విక్టరీ వెంకటేష్ ‘సైంధవ్’ ఎప్పుడో లాక్ చేసుకుంది. దానికన్నా ఒక రోజు ముందు నాని సిద్ధపడుతున్నాడు. ఇక్కడితో అయిపోలేదు. నాని వచ్చే రోజే ‘ఆక్వామెన్ అండ్ ది లాస్ట్ కింగ్ డం’ ఉంటుంది. ఓవర్సీస్ లో దీని క్రేజ్ ముందు పోరాడాలంటే చాలా కష్టపడాలి. షారుఖ్ ఖాన్ రాజ్ కుమార్ హిరానీలా క్రేజీ మూవీ ‘డుంకి’ 22న రావడం ఖాయమే.

ఇవి కాకుండా అక్షయ్ కుమార్ టైగర్ శ్రోఫ్ ల ‘బడే మియా చోటే మియా’ను తక్కువ అంచనా వేయడానికి లేదు. నాని 30 ప్రధానంగా పోటీలోకి తీసుకోవాల్సింది సైంధవ్, ఆక్వామెన్, డుంకిలనే. సంక్రాంతికి ఆల్రెడీ విపరీతమైన పోటీ నెలకొనడంతో సంవత్సరం చివర్లో వచ్చేందుకు హీరోలు ఉత్సాహం చూపిస్తున్నారు. అయితే ఫ్యామిలీ కం ఎమోషనల్ ఎంటర్ టైనర్ తో వస్తున్న నానికి ఈ మూవీ కంప్లీట్ మేకోవర్ లా నిలవనుంది. ఇంకా ఎనిమిది నెలలకు పైగా టైం ఉంది కాబట్టి షూటింగ్ పూర్తయ్యే విషయంలో ఎలాంటి ఇబ్బందులు ఉండవు. సో 2023లో న్యాచురల్ స్టార్ వి రెండు సినిమాలే.