కేజీఎఫ్‌-3పై కీ అప్‌డేట్ వ‌చ్చేసింది

భార‌తీయ ప్రేక్ష‌కుల‌ను ఒక ఊపు ఊపేసిన మాస్ సినిమాల్లో కేజీఎఫ్ గురించి ప్ర‌త్యేకంగా ప్ర‌స్తావించాలి. భాష, ప్రాంత భేదం లేకుండా దేశ‌వ్యాప్తంగా అంద‌రు ప్రేక్ష‌కుల‌కూ ఈ సినిమా తెగ న‌చ్చేసింది. కేజీఎఫ్‌-1, 2 రెండూ కూడా డివైడ్ టాక్‌ను త‌ట్టుకుని తిరుగులేని బ్లాక్‌బ‌స్ట‌ర్లు అయ్యాయి.

గ‌త ఏడాది ఇదే స‌మ‌యంలో రిలీజైన కేజీఎఫ్‌-2 ఏకంగా రూ.1200 కోట్ల‌కు పైగా వ‌సూళ్లు కొల్ల‌గొట్టి ఔరా అనిపించింది. ఈ సినిమా చివ‌ర్లో కేజీఎఫ్‌-3 గురించి హింట్ ఇచ్చిన సంగ‌తి తెలిసిందే. కాక‌పోతే ఆ త‌ర్వాత దీని గురించి ఎలాంటి చ‌ర్చ లేదు. ప్ర‌శాంత్ నీల్ ప్ర‌స్తుతం స‌లార్ సినిమాతో బిజీగా ఉన్నాడు. ఆ త‌ర్వాత ఎన్టీఆర్ సినిమా చేయాల్సి ఉంది. స‌లార్-2కు సీక్వెల్ కూడా వ‌స్తుంద‌ని వార్త‌లొస్తున్న సంగ‌తి తెలిసిందే. ప్ర‌భాస్‌తోనే మ‌రో సినిమా కూడా ఉంటుందంటున్నారు.

ఇన్ని సినిమాల మ‌ధ్య కేజీఎఫ్‌-3 అస‌లుంటుందా అన్న సందేహాలు జ‌నాల్లో ఉన్నాయి. కానీ ఈ సందేహాల‌కు కేజీఎఫ్ నిర్మాణ సంస్థ హోంబ‌లె ఫిలిమ్స్ చెక్ పెట్టింది. కేజీఎఫ్‌-3 క‌చ్చితంగా ఉంటుంద‌ని తెలియ‌జేస్తూ.. ఈ సినిమా క‌థ విష‌యంలోనూ ఒక హింట్ ఇచ్చింది. కేజీఎఫ్‌-2 వార్షికోత్స‌వం నేప‌థ్యంలో హోంబ‌లె ఫిలిమ్స్ ట్విట్ట‌ర్లో ఒక స్పెష‌ల్ వీడియో రిలీజ్ చేసింది.

రాకీ భాయ్ 1978 నుంచి 1981 వ‌ర‌కు ఎక్క‌డ ఉన్నాడు అని అందులో ప్ర‌శ్న లేవ‌నెత్తింది. ఇది కేజీఎఫ్‌-3 క‌థ‌కు సంబంధించిన హింట్ అని భావిస్తున్నారు. ప్ర‌శాంత్ ఎప్పుడు సినిమా చేస్తాడో కానీ.. ఆ మూడేళ్ల‌లో రాకీ ఏం చేశాడు అనే నేప‌థ్యంలోనే ఈ సినిమాను న‌డిపిస్తాడ‌న్న‌ది స్ప‌ష్టం. కేజీఎఫ్‌-2లో బంగారంతో పాటే రాకీ స‌ముద్రంలో మునిగిపోతున్న‌ట్లు చూపిస్తారు. కానీ అక్క‌డి నుంచి త‌ప్పించుకున్నాక రాకీ జ‌ర్నీని చాప్ట‌ర్-3లో చూపిస్తార‌న్న‌మాట‌.