స్పైడ‌ర్ ఫెయిల్యూర్‌పై మురుగ‌దాస్..

తెలుగు స్టార్ హీరోల‌కు ముందు నుంచి త‌మిళ ద‌ర్వ‌కులంటే మోజే. కానీ అక్క‌డి ద‌ర్శ‌కులు మ‌న హీరోల‌కు ఎక్కువ‌గా ఫెయిల్యూర్లే అందించారు. త‌మిళంలో బ్లాక్‌బ‌స్ట‌ర్ల మీద బ్లాక్‌బ‌స్ట‌ర్లు కొట్టిన మురుగ‌దాస్ సైతం తెలుగులో రెండు ఫెయిల్యూర్ సినిమాలే ఇచ్చాడు. చిరంజీవితో చేసిన స్టాలిన్ అయినా కాస్త ప‌ర్వాలేదు కానీ.. మ‌హేష్ బాబుతో ఆయ‌న తీసిన స్పైడ‌ర్ మాత్రం పెద్ద డిజాస్ట‌రే అయింది.

మురుగదాస్ టాప్ ఫాంలో ఉండ‌గా చేసిన ఈ సినిమా అంచ‌నాల‌ను అందుకోలేక ఘోరంగా దెబ్బ తింది. మురుగ‌దాస్ ప‌త‌నం కూడా ఈ సినిమాతోనే మొద‌లై, ఆ త‌ర్వాత ఒక్క స‌క్సెస్ ఫుల్ సినిమా కూడా అందించ‌లేక‌పోయాడు. ప్ర‌స్తుతం ఆయ‌న సినిమానే చేయ‌కుండా ఖాళీగా ఉన్నాడు. ఐతే త‌న నిర్మాణంలో తెర‌కెక్కిన 1947 అనే సినిమా తెలుగు వెర్ష‌న్ ప్ర‌మోష‌న్ల కోసం హైద‌రాబాద్‌కు వ‌చ్చిన మురుగ‌దాస్.. స్పైడ‌ర్ ఫెయిల్యూర్ గురించి విలేక‌రులు అడిగిన ప్ర‌శ్న‌కు బ‌దులిచ్చాడు.

రీమేక్ సినిమాల‌ను ప‌క్క‌న పెడితే.. హిట్, ప్లాప్ అని తేడా లేకుండా ప్ర‌తి సినిమాకూ ఒకేలా క‌ష్ట‌ప‌డ‌తామ‌ని.. స్పైడ‌ర్ విష‌యంలోనూ అలాగే క‌ష్ట‌పడ్డామ‌ని మురుగ‌దాస్ తెలిపాడు. ప్రేక్ష‌కుల అంచ‌నాలు, ద‌ర్శ‌కుల క్రియేటివిటీ క‌లిసిన‌పుడు హిట్ సినిమా వ‌స్తుంద‌ని.. అలా కాన‌పుడు ఫెయిల్యూర్ ఎదుర‌వుతుంద‌ని మురుగ‌దాస్ అన్నాడు.

స్పైడ‌ర్ ఫెయిల్యూర్ త‌న‌ను నిరాశ‌కు గురి చేసింద‌ని, మ‌హేష్ బాబుకు హిట్ ఇవ్వ‌లేక‌పోయానే అని బాధ ప‌డ్డాన‌ని.. కానీ మ‌హేష్‌తో మ‌ళ్లీ క‌చ్చితంగా సినిమా చేస్తాన‌ని, హిట్ కొడ‌తాన‌ని మురుగ‌దాస్ ధీమా వ్య‌క్తం చేశాడు. ఇక అల్లు అర్జున్‌తో సినిమా చేసే విష‌య‌మై మాట్లాడుతూ.. ప్ర‌తి ద‌ర్శ‌కుడూ ప‌ది మంది హీరోల‌ను క‌లుస్తాడ‌ని, అలాగే హీరో కూడా ప‌దిమంది ద‌ర్శ‌కుల‌ను మీట్ అవుతాడ‌ని.. కానీ ఎవ‌రితో సినిమా కుదురుతుందో చెప్ప‌లేమ‌ని.. అల్లు అర్జున్‌తో త‌న సినిమా చ‌ర్చ‌లు ప్రాథ‌మిక ద‌శ‌లోనే ఉన్నాయ‌ని మురుగ‌దాస్ తెలిపాడు.