నాని నెక్స్ట్ లెవెల్‌కు వెళ్లినట్లేనా?

ఎనిమిదేళ్ల ముందు ‘భలే భలే మగాడివోయ్’ సినిమా టైటిల్స్‌లో నాని పేరు ముందు ‘నేచురల్ స్టార్’ అని పడింది. అది చూసి చాలామంది వెటకారాలు కూడా ఆడారు. నానికి అప్పుడే స్టార్ ఇమేజ్ వచ్చేసిందా.. అతడికి కూడా ఒక ట్యాగ్ అవసరమా అని. నిజానికి మారుతి సరదాకే ఆ ట్యాగ్ వేశాడేమో. కానీ జనాలు దాన్ని సీరియస్‌గానే తీసుకున్నారు. మీడియా వాళ్లతో పాటు నానీని అభిమానించే వాళ్లు కూడా అతణ్ని నేచురల్ స్టార్ అని పిలవడం మొదలుపెట్టారు.

‘భలే భలే మగాడివోయ్’ ఎవ్వరూ ఊహించని స్థాయిలో భారీ విజయం సాధించి నాని తక్కువోడు కాదు అని రుజువు చేసింది. ఆ తర్వాత వరుసబెట్టి హిట్లు కొట్టి టాలీవుడ్లో మిడ్ రేంజ్ స్టార్లలో ఒకడిగా ఎదిగాడు నాని. ‘ఎంసీఏ’ లాంటి మామూలు సినిమా కూడా ఆ ఊపులో బ్లాక్‌బస్టర్ అయి కూర్చుంది. ఆ తర్వాత నాని కొంత తడబడ్డప్పటికీ.. తనకంటూ ఒక ఫ్యాన్ ఫాలోయింగ్, మార్కెట్ మెయింటైన్ చేస్తూ వచ్చాడు.

ఐతే కెరీర్లో ఒక దశ దాటి ఇంకో దశకు చేరాక ఎక్కువ కాలం అదే స్థాయిలో ఉంటే ఎదుగుదల ఆగిపోయినట్లే అనిపిస్తుంది. నాని ఫ్యాన్స్ కూడా అతను నెక్స్ట్ లెవెల్‌కు ఎప్పుడు వెళ్తారా అని చూస్తున్నారు. ‘దసరా’ సినిమాతో వారి కోరిక తీరినట్లే కనిపిస్తోంది. టాప్ స్టార్లు మాత్రమే చేసే పక్కా మాస్ పాత్రను ఎంచుకుని పెద్ద సాహసమే చేశాడు నాని. సాఫ్ట్ ఇమేజ్ ఉన్న అతడికి ఇంత ఊర మాస్ పాత్ర సెట్ అవుతుందా అన్న సందేహాలు చాలామంది వ్యక్తం చేశారు. కానీ ‘దసరా’ సినిమా చూశాక ఆ సందేహాలన్నీ పటాపంచలు అయ్యాయి.

ఊర మాస్ స్టయిల్లో హీరోయిజాన్ని పండించి తాను ఏదైనా చేయలగనని చాటి చెప్పాడు. ఇక ఈ సినిమాకు ఉన్న హైప్‌కు తగ్గట్లే ఓపెనింగ్స్ వస్తున్నాయి. తొలి రోజు ఏకంగా రూ.35 కోట్ల గ్రాస్ కలెక్షన్లు అంటే చిన్న విషయం కాదు. టాలీవుడ్లో టైర్-1 హీరోలకు మాత్రమే సాధ్యమైన ఘనత ఇది.

టైర్-2లో ఉన్న రవితేజ, విజయ్ దేవరకొండ, నాగచైతన్య, రామ్ లాంటి హీరోలకు కూడా ఈ మార్కు సాధ్యం కాలేదు. నాని టైర్-1కు ఎదిగిపోయాడు అనలేం. అదే సమయంలో టైర్-2కు పరిమితమూ చేయలేం. మధ్యలో ఒక కొత్త లీగ్‌లోకి అతను అడుగుపెట్టాడని చెప్పొచ్చు. ‘దసరా’తో పాన్ ఇండియా ఇమేజ్ సంపాదించి.. నిలకడగా ఘన విజయాలు సాధిస్తే.. భవిష్యత్తులో టాప్ లీగ్‌లోకి వెళ్లినా ఆశ్చర్యం లేదు.